Os yemenins son un pueblo u conchunto de pueblos de luenga semita que habita en o sud-ueste d'a peninsula Arabica, correspondendo o suyo territorio d'alto u baixo con l'actual Yemen. Tienen tradicions diferents d'o disierto Arabico por estar a suya tierra prou diferent en clima, topografía y vías de comunicación. Bel clan yemenín ha teniu importancia en a historia d'Al Andalús, en especial en a val d'Ebro.
Dende o punto de vista lingüistico a mayor part parlan arabe, pero encara quedan minorías que charran atras luengas semiticas de brancas diferents a l'arabe.
Dende o punto de vista relichioso ye destacable a presencia d'importants grupos chiitas, como os zaydi d'os tozals d'o norte. Bi ha tamién bels mils de chiitas ismailitas y sunnitas que siguen a escuela xafí, concentraus en o sud y a costa. Os chudeus yemenins descienden en mayor mesura de yemenins preislamicos que de refuchiaus u comerciants orichinarios de Tierra Santa, Echipto u Mesopotamia.
Encara que viven en poblaus y aldeyas, encara mantienen as filiacions tribals. En a costa bi ha pescadors. En Hadhramaut bi ha beduins nomadas y sedentarizaus.
Referencias
Bibliografía Gonen, Amiram. Diccionario de los pueblos del mundo. Anaya&Mario Muchnik, 1996. ISBN 978-8479793500.
Categoría:Pueblos arabes Categoría:Etnias de Yemen