Os cabardos u cabardins son un pueblo circasián que habita as cuencas d'os ríos Malka, Baksan y Terec (Republica Autonoma de Cabardino-Balcaria), en a costera norte d'o Caucaso central. Parlan una luenga caucasica nordoccidental y a mayoría son musulmans sunnitas d'a escuela Hanafí. D'alcuerdo con o censo sovietico de 1989 os "cabardos" yeran 363.000 individuos en Cabardino-Balcaria y os "cherqueses" 52.000 en Carachaievo-Cherquesia.
Modo de vida tradicional A economía tradicional se basa en l'agricultura y a cría de caballos. Actualment os kabardos tamién treballan en diferents sectors d'a industria urbana.
Luenga As luengas caucasicas nortoccidentals que parlan os circasians, abkhasios, abazos y ubikhes son muito pareixitas totas y tienen un alto grau de intercomprensión entre ellas. As autoridaz sovieticas han creyato diferents stándards escritos pa os dos grupos cheograficos de parlas circasianas pa evitar que i haiga una sola luenga escrita circasiana. O cabardino escrito se basa en a parla bacsana d'a Cabardia Gran. Entre 1925 y 1938 facioron servir l'alfabeto latín, pero en 1938 as autoridaz sovieticas introducioron l'alfabeto cerilico. L'alfabeto cerilico introduciu pa os dos stándards circasians, pa l'abkhasio y l'abazo son variants diferents de l'alfabeto cerilico y totas dificils de fer servir, tot pa evitar que os caucasians nordoccidentals s'entiendan por escrito.
Relichión Se convirtioron a la relichión musulmana dende os sieglos XVI y XVII como atros pueblos caucasicos, baixo a influencia d'o Khanato de Crimea y l'Imperio Otomán. Os cabardos d'a redolata de Mozdok son cristianos ortodoxos como os rusos.
Historia Descienden de circasians que s'establioron en os sieglos XIII y XIV en a ribera ezquierda d'o río Terec (Cabardia Gran) y dimpués en a ribera dreita (Cabardia Chica). En a epoca d'expansión de l'Imperio Ruso por o Caucaso estioron pro-rusos y no participoron en as revueltas antirrusas, y representaban una falca pro rusa que crebaba a contunuidat territorial d'os dos focos de revuelta antirrusa: os circasians occidentals a l'ueste y los chechens y daguestanís de Xamil a l'este.
En a primera metat d'o sieglo XIX bels cabardos se reasentoron en a cuenca alta d'o río Cubano convertindo-se en atra branca d'os circasians que ye conoixita como "cherqueses" y por ixo a demarcación territorial on viven se conoix como "Rechión Autonoma de Carachaievo-Cherquesia", encara que a denominación de "cherqués" siga historicament cheneral pa toz os pueblos circasians.
Bibliografía Gonen, Amiram. Diccionario de los pueblos del mundo. Editorial Anaya, 1996. ISBN 978-8479793500. Fernández-Armesto, Felipe. Los hijos de Zeus. Pueblos, etnias y culturas de Europa. Editorial Grijalbo, 1996.
Categoría:Pueblos circasians Categoría:Etnias de Rusia Categoría:Etnias de Turquía Categoría:Etnias de Chordania