Pedro María de Ric y Monserrat, naixito de Fonz (Ribagorza) o 24 de setiembre de 1776 y muerto en ixa mesma villa o 29 de marzo de 1831, estió un machistrato y politico aragonés, III barón de Valdeolivos. Fillo de Miguel Esteban Ric y Pueyo de Urriés (II barón de Valdeolivos) y d'a suya muller Ana María Monserrat y Ustariz, feba parte d'o linache d'os Ric.
Formato en a Universidat de Uesca, estió dimpués profesor en ixa mesma institución, plegando mesmo a estar-ne o suyo rector. Nombrato camarero secreto d'o Papa, aproveitó o suyo viache enta Roma ta portar-sen o cuerpo de Sant Vicient, que depositó en a suya villa natal. Destinato dimpués en a ciudat de Zaragoza como machistrato d'a Reyal Audiencia d'Aragón, se i trobaba mientres os Seches de Zaragoza en a Guerra d'o Francés, prenendo parte en a esfensa d'a ciudat contra l'Exercito francés. En ixa labor conoixió a María de la Consolación Azlor y Villavicencio, contesa vídua de Bureta, con qui casó l'1 d'octubre de 1808. Mientres o Segundo Seche de Zaragoza, Pedro María de Ric estió president d'a Chunta Suprema d'Aragón, marchando dimpués d'a capitulación d'a ciudat en primeras enta Valencia (a on naixió a suya filla) y dimpués enta Cádiz. Dimpués d'a restauración de Ferrando VII d'Espanya ocupó bellos cargos politicos en Madrit, antis de retirar-se enta la suya villa natal, a on i morió. Fue apedacato en o paneyón familiar en a ilesia parroquial de Fonz.
Vinclos externos Gregorio García Ciprés: Los Ric, barones de Valdeolivos, Linajes de Aragón, 15 d'aviento de 1912. Pedro María Ric y Monserrat en a Gran Enciclopedia Aragonesa''.
Referencias
Categoría:Alumnos d'a Universidat Sertoriana de Uesca Categoría:Churistas d'Aragón Categoría:Naixius de Fonz Categoría:Muertos en Fonz Categoría:Personas d'os Seches de Zaragoza Categoría:Politicos d'Aragón Categoría:Profesors d'a Universidat Sertoriana de Uesca Categoría:Rectors d'a Universidat Sertoriana de Uesca Categoría:1776 (naixencias) Categoría:1831 (muertes)