Antonio Tovar Llorente, naixito de Valladolit (Castiella) o 17 de mayo de 1911 y muerto en Madrit o 13 d'aviento de 1985, estió un filologo, lingüista y historiador espanyol, miembro d'a Real Academia Española.
Fillo de notario, vivió de nino en o País Basco y en o País Valenciano, a on i aprendió o basco y o catalán. Estudiant de Dreito, Historia y Filolochía en cuantas universidaz, estió en primeras president d'a Federación Universitaria de Estudiantes en a suya ciudat natal, ta dimpués convertir-se en colaborador de Dionisio Ridruejo y de Falange Española. En primerías d'a Guerra Civil espanyola estió responsable de Radio Nacional de España d'os sublevatos en a Chunta de Burgos, convertindo-se dimpués en aduyant de Ramón Serrano Súñer, ministro d'Asuntos Foranos d'o rechimen de Francisco Franco.
Sindembargo, dende 1942 se deseparó d'a vida politica, ganando una catedra en a Universidad de Salamanca, d'a on dimpués se convertió en rector. Prencipió tamién o suyo distanciamiento con o franquismo, habendo mesmo d'exiliar-se; antiparte, en tornar en Espanya se solidarizó con os profesors Enrique Tierno Galván, José Luis López Aranguren, Agustín García Calvo y Santiago Montero Díaz cuan foron expedientatos, marchando una atra vegata enta Estaus Unius y dimpués en Alemanya dica a suya chubilación.
Categoría:Filologos d'Espanya Categoría:Historiadors d'Espanya Categoría:Lingüistas d'Espanya Categoría:Miembros d'a Real Academia Española Categoría:Muertos en Madrit Categoría:Naixius de Valladolit Categoría:1911 (naixencias) Categoría:1985 (muertes)