Os Monts de l'Altai (Алтай en mongol y ruso, Kin Shan en chinés) ye una rechión montanyosa situata en l'aria on mugan Siberia (Rusia), Mongolia, China y Cazaquistán. S'estendilla dende a val d'o río Irtix y a depresión de Dzhungaria a l'ueste dica os Monts Sayan a l'este, y dica l'altiplán de Mongolia a lo sud.
Ye trescurzata por diferents cordeleras, as principals son Tannu Ola y l'Altai propiament dito, en tierras mongolas, tamién dito Altai Mongol u Gran Altai. A tuca mes altera ye o mont Belukha (4.506).
Ye una rechión con lacos importants como l'Uvs Nuur y o Khovd Nuur, i aquí ye on naixe o río Obi, en o forcallo d'o Katun y o Bia. Tien 1.600 km de luengo entre o laco Saisan y o territorio a lo suduest de l'alt Selenga y de l'Orkhon superior.
A part rusa comprende a republica de l'Altai y o territorio de l'Altai.
Toponimia Existen hipotesi que consideran l'aria de l'Altai como l'orichen d'os pueblos turquicos. L'antiga denominación en as inscripcions de l'Orkhon ye Altin-yish ('Montanyas d'Oro'), en chino Kin Shan. Os griegos parlan d' Ektag, pero segurament se tracta d'Ak Tagh, a Montanya Blanca, equivalent a lo Tian Shan.
O nombre moderno (d'o turquico Alitau, 'Montanyas d'Oro') apareix por primera vegata en o periodo de dominio oirato.
En a traducción aragonesa d'o "Libro de Marco Polo" parlan d'un mont dito Altay on levoron a soterrar a Mongke Khan:
Manimenos de seguro que no corresponde a esta cordelera, car esta denominación ye aplicata en as Cronicas Sanang Setzen a las Montanyas Khingan d'os chineses, una cordelera que bi ha chusto a lo norte d'a Gran Muralla Chinesa a man de Kalgan. Tampoco puet corresponder a las Montanyas Khingan, y por o puesto on se sabe que soterraban a los khans mongols se suposa que sería a man d'Urga.
Categoría:Cordeleras d'Asia Categoría:Cordeleras de Cazaquistán Categoría:Cordeleras de China Categoría:Cordeleras de Mongolia Categoría:Cordeleras de Rusia