A conchugación verbal en aragonés consiste en tres conchugacions resultau d'a evolución d'as cuatre conchugacions latinas y d'o paso d'a mes gran part d'os verbos d'a tercera conchugación latina (esdrúixola) a la segunda conchugación (plana), de fueras d'un pocos verbos que pasoron a la cuatrena conchugación latina u a la tercera conchugación aragonesa.
En a conchugación verbal aragonesa bi ha formas personals y formas impersonals y diferents tiempos verbals, simples y composaus. Bi ha tres modos: indicativo, subchuntivo e imperativo.
A primera conchugación aragonesa ye formada por verbos con infinitivos en -ar y ye resultau d'a evolución d'a primera conchugación latina de verbos con infinitivos en -ARE. Como modelo de verbo regular se gosa prener o verbo cantar, encara que bel autor fa servir o verbo aduyar.
A segunda conchugación aragonesa ye formada por verbos con infinitivos en -er y ye a evolución directa d'a segunda conchugación latina de verbos con infinitivos plans en -ĒRE. A tercera conchugación latina de verbos con infinitivos esdrúixols en -ĔRE quedó vuida por o cambio accentual, que suposaba pasar a l'anterior conchugación de verbos con infinitivo plan, de fueras de poquez que pasoron a la cuatrena conchugación latina u a la tercera conchugación aragonesa. Manimenos en aragonés benasqués en quedan restos, a l'igual que en catalán y luengas galorromanicas. Se gosa fer servir como modelo d'a segunda conchugación aragonesa os verbos temer y meter, encara que meter puet presentar un participio fuerte.
A tercera conchugación aragonesa ye formada por verbos con infinitivos en -ir y ye a evolución directa d'a cuatrena conchugación latina de verbos con infinitivos en -IRE. Se gosa fer servir como verbo modelo d'esta conchugación o verbo partir.
A conchugación verbal de l'aragonés ye un d'os sistemas gramaticals que ha sufriu en mayor grau a castellanización d'o sieglo XX.
Referencias
Bibliografía Heinrich Lausberg: Lingüistica romanica. Tomo II morfología. Editorial Gredos, 1988. pp 258–259. José Antonio Saura Rami: Elementos de fonética y morfosintaxis benasquesas, Zaragoza, Gara d'Edizions-Institución Fernando el Católico (2003). KUHN, Alwin, El Dialecto Altoaragonés (traducción de l'orichinal de 1935); Xordica Editorial. Zaragoza, 2008.
*