A seu de Christchurch (en anglés ChristChurch Cathedral) ye una seu anglicana en Christchurch, Nueva Zelanda, construyida en a segunda metat d'o sieglo XIX. Ye situada en o centro d'a ciudat, rodiada por a Plaza d'a Seu. Ye a seu d'a Diocesi Anglicana de Christchurch.

A nau y a torre fuoron consagradas en 1881, l'edificio no se remató dica 1904.

Historia A seu fue disenyada orichinalment por l'arquitecto britanico Sir George Gilbert Scott con a revisión de l'arquitecto neozelandés Benjamin Mountfort. Os plans primers yeran d'un edificio de fusta, pero fuoron cambiaus con o descubrimiento d'una piedra local de buena calidat. As fustas de matai y totara procedents d'a peninsula de Banks fuoron emplegadas ta os soportes d'o teito.

A torre d'a seu plegaba dica os 63 metros d'altaria, podeba estar vesitada y ufriba polidas anvistas d'a ciudat. A torre ha estau danyada por tierratremos en tres ocasions.

A seu sufrió reformas importants entre os anyos 2006 y 2007, incluyindo a substitución d'as tellas de pizarra d'o suyo tellau.

Tierratremos A o largo d'a suya historia a seu ha estau danyada por cuantos tierratremos, como en 1881, 1888, 1901, 1922, 2010 y 2011.

O 22 de febrero de 2011, un cerenyo tierratremo de 6,3 graus afectó a la ciudat de Christchurch, a seu quedó cuasi estricallada y a torre en agulla s'espaldó de tot y cayió enta a plaza. Manimenos encara que a suya estructura quedó muit danyada, a mayor parti d'o cuerpo de l'edificio continó en piet.

O 13 de chunio de 2011, a seu tornó a soportar un atro tierratremo a 6,3 graus, o rosetón ueste d'a seu cayió y se planteyó a posibilidat de si a catedral había d'estar desacralizada y espaldada. O 28 d'octubre d'ixe anyo s'anunció oficialment que a seu debería estar desacralizada y a o menos parcialment espaldada. A la fin o 9 de noviembre se fació una emotiva ceremonia de "desacralización".

Galería

Referencias

Se veiga tamién Seu d'o Santismo Sacramento de Christchurch Seu de Cartón de Christchurch

Vinclos externos

Pachina oficial d'a seu.

Christchurch Categoría:Ilesias de Christchurch