A puerta d'el Duque de la Vitoria yera una puerta d'a muralla medieval d'a ciudat de Zaragoza. Se trobaba situada chunto a la ilesia de Sant Miguel d'os Navarros.
Historia A puerta se devantó con motivo d'a vesita a la ciudat en 1856 d'o Duque de la Vitoria, o Cheneral Espartero, que i veniba pa fer a devantadera d'as obras d'a linia de ferrocarril entre Zaragoza y Madrit. Asinas a suya comitiva dentraría a la ciudat por a puerta de Santa Engracia pa dimpués trescruzar a que levaba o suyo nombre. A construccion estió decisión de Juan Bruil, amigo y partidario d'o cheneral y persona influyent en Zaragoza por ixas envueltas, estando propietario d'a-saber-las fincas en ciudat, incluyindo en a que se troba l'actual parque Bruil. O propio Buil s'encargó tamién d'a suya financiación.
A plaza de Sant Miguel amenistaba d'una apertura en a muralla medieval que permitise a comunicación con o puent nuevo de Sant Chusé sobre a Uerba. Ta par d'alavez no yera posible l'acceso dende ista plaza enta o río ni enta a carrera d'el Coso.
A construcción d'a puerta se fació a garras templadas pa mirar de que Espartero podese inaugurar-la, lo que prevocó que s'espaldase parcialment en poco tiempo. Dimpués d'esboldregar-la de tot, tornó a construyir-se un atra nueva de fierro fundiu pintau en tonos royencos, d'estilo chonico y con tres arcos d'acceso, o central mas gran pa que podese entrar o trafico rodau y con una inscripción dencima que deciba "Puerta del Duque de la Victoria". S'ubrió a o publico o 5 d'octubre de 1865.
Dimpués d'a revolución de l'anyo 1868 fue danyada, encara que continó en piet. Con o creiximiento d'a ciudat y d'o rete de tramvía se decidió en 1911 eliminar os accesos laterals pa piatons, mantenindo-se nomás l'arco central. En l'anyo 1919 remató por desmontar-se tamién l'unico arco que encara quedaba. Actualment bi ha una representación d'a puerta pintada en o muro d'un edificio d'a carrera Reconquista que mira enta a plaza Sant Miguel.
Vinclos externos Puerta d'el Duque de la Vitoria en o Blog antiguaspuertaszaragoza.wordpress.com
Duque de la Vitoria Categoría:Edificios desapareixius de Zaragoza