Feners (en castellano Fenés) yera un lugar medieval situau en l'actual municipio de Samianigo.
Se troba en Sobrepuerto, entre Sasa y Fandiello. En iste puesto encara bi ha pardina de Feners, de l'anyo 1929 y a ermita de Sant Marcos d'orichen romanico, reconstruyida en o sieglo XVII sobre lo que sería l'antiga ilesia parroquial d'o lugar. Comunica con Sobrarbe (municipio de Fiscal) a traviés d'o cuello de Feners (1332 m). Dica primerías d'o sieglo XX encara exixtiba una romería a la ermita de Sant Marcos que se feba o 25 d'abril y en a que feban parti bellas casas de Sasa y Fandiello.
Toponimia Como o propio nombre indica iste toponimo ye o plural de "fenero", o campo d'a on se quita o feno. Geografía medieval de Serrablo. José Miguel Navarro López. Colección «A Lazena de yaya», 15.
Historia Se documenta que en 1279 istas tierras perteneixeban a l'arcedianato de Rava. A ilesia d'o lugar tenió a categoría de vicaría entre os sieglos XIII y XIV, pasando en o sieglo XVI a rectoría.
Igual que en atros lugars d'ista comarca y por orden de Chaime I d'Aragón, o día 8 de chunio de 1338, Exemén Pérez de Hueso, procurador d'os "obreros de la obra de Jhesu Nazareno de la Siet de Huesca" y o notario Ramón Pérez de Sant Vicient, vesitoron a parroquía de Feners pa replegar diners pa a construcción d'a seu de Santa María de Uesca. Sinyan como testigos de l'acto "Pero Vergua e García Latre, escuderos". O 2 de noviembre de 1402 se pasó atra vegada por a parroquia pa replegar mas diners pa la seu, bosando en iste caso 15 sueldos chaqueses.
Jordán de Asso nombra a Feners entre os lugars desapareixius perteneixients a la circunscripción de Chaca, situando-lo entre Fanlo y Espín "Historia de la economía política de Aragón", Ignacio de Asso, Zaragoza, 1798. Reed. facs., Zaragoza, Guara, 1983, p. 182.. D'atra man Pascual Madoz diz que yera una pardina con un termín que s'estendillaba una hora de norte enta sud y que teneba una ermita y auguas de mala calidat. Os suyos monts cubiertos de selva serviban a os habitants de Ciellas. "Diccionario geográfico-estadístico-histórico...", Pascual Madoz, 1845-1850, ed. facs., Zaragoza, PRAMES, 1997, tomo "Huesca", p. 179.
Leyendas Entre os habitants de Sasa y Fandiello se conserva o mito d'as viellas pervivients en relación a iste lugar. En iste caso yeran tres chirmanas que fuoron acullidas por as casas Ramón y Juan Domingo de Sasa y casa San Román de Fandiello. Asinas a propiedaz d'as tierras de Feners s'espartió a partis iguals entre istas tres casasAndrés López, Sasa, 1998.
Un atra versión recullida ista vegada por Enrique Satué diz que yerán nomás dos as mullers supervivients y que fuoron acullidas l'una en casa San Román de Fandiello y l'atra entre casa Ramón y casa Juan Domingo de Sasa, por lo que metat d'a pardina perteneixeba a la debantdita casa de Fandiello y as dos de Sasa teneban nomás un cuarto cadaguna. "El Pirineo contado", Enrique Satué Oliván, Uesca, ed. de l'autor, 1995, p. 91.
Referencias
Categoría:Despoblaus medievals d'a provincia de Uesca Categoría:Lugars desapareixius de Yebra de Basa Categoría:Pardinas