Lucía López Marco (Zaragoza, 10 de setiembre de 1988) ye una albeitar aragonesa, divulgadora sobre o medio rural y l'agroecolochía y coordinadora d'a ONG Justicia Alimentaria en Aragón. Amás ye escritora en luenga aragonesa, habendo ganau bels premios importants entre os que destaca o Premio Arnal Cavero de l'anyo 2022.
Biografía En l'anyo 2012 se licenció en Albeitaría por a Universidat de Zaragoza, ya que o suyo suenio yera tener una explotación vacuna. Pero por o camín descubrió l'agroecolochía y a divulgación: en l'anyo 2015 reyalizó un máster en Agroecolochía, Desarrollo Rural y Agroturismo en a Universidat Miguel Hernández d'Elch y en l'anyo 2019 fació un máster en Periodismo y Comunicación Cientifica por a UNED. Contina soniando con ir pastora bel día. En l'anyo 2020 se tresladó a vivir ta Navasa, localidat d'o municipio de Chaca, en a comarca d'a Chacetania, en a provincia de Uesca, bels meses antis de que naixiera a suya primera filla.
Trachectoria profesional Dende que remató os suyos estudios, ha treballau y colaborau en cuantos prochectos arredol d'a ganadería sustenible, o desarrollo rural y a sobiranía alimentaria en Bolivia, Alemanya, Aragón y Cantabria. Ha treballau en l'Instituto Agronomico Mediterranio de Zaragoza (IAMZ-CIHEAM) en cuantos prochectos d'investigación, como SIMRA (Innovación Social en Arias Rurals Marchinals) u iSAGE (Innovación pa la sustenibilidat d'ovinos y cabrinos en Europa); y en os rez d'investigación d'o CIHEAM, como o ret FAO-CIHEAM d'ovinos y cabrinos. Y previament en as arias de transferencia y formación y de socioeconomía d'o Centro d'Investigación y Formación Agrarias de Cantabria (CIFA Cantabria).
Dende l'anyo 2020 treballa como coordinadora d'a ONG Justicia Alimentaria en Aragón.
Mallata En l'anyo 2015 ubrió o blog mallata.com sobre ganadería extensiva, medio ambient, agroecolochía y desarrollo rural. "Mallata" ye un termín aragonés pa nombrar a puesto en mel meyo d'o campo que sirve de cubilar a o bestiar y a os pastors en as nueiz de pastoreyo o transhumancia.
En mallata.com se puet consultar un mapa, publicau en l'anyo 2020, que reculle mas de 350 iniciativas empentadas por mullers rurals en localidaz de menos de 20.000 habitants, u o mapa que replega 18 iniciativas de transformación y puesta en valura d'a lana de razas autoctonas. Tamién se pueden leyer y consultar gratuitament os numeros publicaus en a Revista Mallata, disponible tanto en aragonés como en castellano y que reculle testimonios narraus en primera persona por as suyas protagonistas: mullers que viven y treballan en o medio rural.
Colaboracions con atras iniciativas d'o medio rural Fa parti d'o prochecto de Dinamización d'iniciativas sustenibles y locals en o Pireneu y Semontano Aragonés (Mincha d’aquí), de RuralESS (Grupo dinamizador de la Economía Social y Solidaria en el medio rural aragonés). Fa parti d'a Chunta Directiva d'a Plataforma por a Ganadería Extensiva y o Pastoralismo dende a suya creyación en l'anyo 2017.
Fa parti d'o Ret de Periodistas Rurals. Colabora en distintos medios d'información como ElDiario.es d'Aragón, The Conversation España, Revista Agroecólogica de divulgación, Divulga UNED, Red Científica Remedia, AraInfo, entre atros.
Dende 2018 escribe chunto con María Sánchez o manifiesto feminista 'Por un feminismo de hermanas de tierra' que renuevan cada anyo pa dar a conoixer as reivindicacions d'as mullers rurals con motivo d'o 8 de marzo.
Obras Ha colaborau en a realización de libros tematicos sobre feminismo y cambio climatico, en a realización de series tematicas sobre temas agroganaders, ha feito publicacions cientificas sobre mullers rurals, despoblación u etnoveterinaria.
Premios y reconoiximientos 2014 Copla ganadora en l'anyo 2014 del XVII concurso de coplas en aragonés d'o Concello de Zaragoza. 2021 XV edición d'os Premios 20Blogs millor blog en a categoría Blogosfera Verde. 2021 XXIV edición Premios Félix de Azara d'a Deputación Provincial de Uesca, en a categoría de medios de comunicación social, premio por ‘Mallata’, un blog sobre o medio rural. 2022 Premio Arnal Cavero 2022 a la suya obra literaria en aragonés Cuan plegue o colapso.
Referencias
Vinclos externos Mallata Justicia Alimentaria
Categoría:Albeitars d'Aragón Categoría:Escritors d'Aragón Categoría:Escritors en aragonés Categoría:Feministas d'Aragón Categoría:Ganadors d'o Premio Arnal Cavero Categoría:Naixius de Zaragoza Categoría:1988 (naixencias)