O monesterio de Sant Chusé y Santa Tresa de Zaragoza ye un monesterio que se troba en a ciudat de Zaragoza (Comarca Central, Aragón). Perteneixe a l'arcipestrau d'o Rabal.
Historia O 15 d'octubre de 1582 muere santa Tresa d'Ávila, deixando establius 17 conventos de monchas Carmelitas Descalzas, cuasi toz éls en Castiella y denguno en Aragón, por lo que l'arcipestre d'a seu de Zaragoza, Cheronimo de Sora, demanda o establimiento d'un d'éls. Se designarán pa iste nuevo convento baixo l'advocación de sant Chusé a siet monchas provenients de Segovia, salindo d'ista ciudat o 22 de chulio de 1588.
En primeras s'establioron en una casa d'a carrera Mantería, tresladando-se dimpués provisionalment a un convento que yeran edificando por ixas envueltas os padres domenicos en o puesto a on ye actualment a ilesia de Sant Chaime. En 1602 se torna a tresladar a comunidat enta o convento situau entre as actuals carrera Bilbao y carrera Casa Jiménez. En 1603 siet monchas marchan pa establir o convento d'o Carmelo de Calatayú. Mientres a Guerra d'o Francés o monesterio se convierte en frent de batalla y ye evacuau por orden d'o cheneral Palafox. As monchas se refuchian en diferents casas y templos d'a ciudat incluyindo o convento d'as Fecetas pa tresladar-se dimpués mientres cinco anyos ta Uesca.
O 23 de febrero de 1814 tornan ta Zaragoza diez relichiosas mirando de recuperar o convento, que por ixas envueltas yera ocupau por o parque d'incheniers. Dimpués d'una audiencia con o rei Ferrando VII o convento les ye tornau, encara que nomás por un periodo de vinte anyos, dica a desamortización de Mendizábal cuan habrán d'albandonar-lo definitivament, convertindo-se l'edificio en seu d'o Gubierno Militar y pasando posteriorment a titularidat d'o Concello de Zaragoza. En os anyos posteriors as monchas d'a comunidat tornarán ta o monesterio d'as suyas chirmanas de santa Tresa, as Fecetas, dica 1853 y dimpués a o noviciau d'os domenicos dica 1868. A siguient decada s'establirán en o monesterio d'a Encarnación d'as Carmelitas de l'Antigua Observancia.
Finalment crompan un nuevo edificio en o Rabal, en l'actual carrera Sobrarbe, a on se tresladan en 1878. O zaguer treslau d'a comunidat se produce o 5 de noviembre de 1954 cuan albandonan o convento viello pa tresladar-se enta l'actual situau en l'avenida Catalunya. O 24 d'agosto de 2022 as monchas d'o monesterio de Santa Tresa (Fecetas) deciden zarrar o suyo monesterio y fusionar-se con o de Sant Chusé, formando asinas o Carmelo de Sant Chusé y Santa Tresa.
Se veiga tamién Convento d'as Fecetas de Zaragoza. Convento de Sant Chusé de Zaragoza.
Vinclos externos Web oficial
Chuse y Tresa Chuse y Tresa de Zaragoza Chuse y Tresa de Zaragoza Chuse y Tresa de Zaragoza Categoría:Conventos carmelitas descalzos