A chudería de Calatayú estió l'antigo barrio chudieu d'a ciudat de Calatayú. Se trobaba situada en o mesmo puesto de l'actual barrio d'a Consolación y estió una d'as mas importants d'o Reino d'Aragón. Así era la poderosa Judería de Calatayud: diez sinagogas, cárcel, hospital...
Descripción A chudería de Calatayú, con o suyo trazau d'inspiración islamica, se troba en un tozal en a parti nordoccidental d'a ciudat, debaixo d'o castiello de Don Alvaro u de Donya Martina (popularment conoixiu como castiello d'a Chudería). As suyas carreras yeran sinuosas y zigzaguiants, estando a prencipal, u "carrera mayor d'a chudería", l'actual carrera d'a Consolación. Atras importants yeran a carrera de Torre Mocha y a cuesta de Santa Ana.
I heba cuatre dentradas u puertas, a prencipal d'ellas situada en a plaza de Sant Andreu, en l'extremo este d'a chudería. A puerta sud se trobaba en o barranco d'o Puent Seco y a la suya dreita naixeba a dita "puya de Sancta Maria de la Penya". A l'atro canto d'o barranco d'as Pozas yera a puerta "vulgarment clamada Furiega". Flanquiada por dos torretons, a traviés d'ella y por a "carrera de Moros" se'n iba enta os lugars d'as vals d'os ríos Ribota y Manubles. O postigo de Torre Mocha, ubierto dimpués de que Chaime I hese mandau zarrar en 1264 o castiello homonimo, daba acceso a o barrio de Vallupié.
A chudería contaba con cuatre sinogas propiament ditas: a sinoga Mayor, a “sinoga de los texedores” (conoixida tamién como sinoga Menor), a "sinoga chiqua de las mujeres", a on se trobaba o mikvéh u os banyos rituals femenins y a sinoga de "las carnecerias", dita asinas por trobar-se en a carrera a on yeran as carnecerías.
Historia A historia d'a comunidat chudieva de Calatayú prencipia con a suya fundación como ciudat musulmana, probablement con a construcción d'o suyo recinto esfensivo en l'anyo 862, encara que a estructura churidica de l'alchama no arribará dica zaguerías d'o sieglo XII. Dimpués d'a expulsión d'os chodigos en Francia por Felipe IV plegarán a la ciudat importants grupos de conversos que ascape tornarán a las suyas anteriors creyencias, prevocando una dura represión de man d'a Inquisición. Mientres a guerra con Castiella a chudería fue durament castigada. En rematar dita guerra d'os Dos Peros, o bispe de Tarazona emite en 1368 una licencia pa reedificar y enamplar a sinoga, que heba estau danyada. A comunidat fue tamién prou afectada con motivo d'as alteracions de 1391
En o fogache de 1404 a población chudieva de Calatayú yera de 191 fuegos, representando os suyos 800 habitadors un 12,5% d'a población total d'a ciudat. Dimpués d'a Conferencia de Tortosa, entre os anyos 1412 y 1414, se produce un punto d'inflexión en a comunidat chudieva calatayubina, que prencipia con as conversions masivas. En l'inte d'a publicación de l'edicto que promulga a expulsión d'os chudieus en as coronas d'Aragón y Castiella, i heba una población de 600 chudieus en Calatayú.
Bibliografía Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames.
Referencias
Vinclos externos
Breve guía de la judería de Calatayud La judería de Calatayud. La judería de Calatayud. Turismo de Aragón.
Calatayú Categoría:Historia de Calatayú