A chudería de Balbastro estió l'antigo barrio chudieu d'a ciudat de Balbastro.
Descripción A chudería u "chudaría" se trobaba en a fortaleza musulmana u zuda d'o sieglo X, en o barrio conoixiu como Entremuros. S'estendillaba por as carreras Sant Miguel, Encomienda, la Peña, Esperanza, Entremuro y la Candelaria. Amás d'as viviendas i heba tamién locals comercials como as carnecerías, que tenioron pleitos con o concello d'a ciudat por vender tamién o suyo producto a os habitants cristianos.
A suya sinoga, que fue debantada en l'anyo 1207 reinando Alifonso III, se consagró a o culto cristiano por orden d'o papa Benedet XIII en 1415, una vegada desapareixida a comunidat chudieva. Pareixe que correspondería a la posterior ermita de Sant Salvador, actualment desapareixida, que había de trobar-se en a confluyencia d'as actuals carreras La Peña, Esperanza y Mirador.
Historia Ya i heba población chudieva en a ciudat mientres o periodo islamico, encara a primera mención d'ista comunidat ye a meyaus d'o sieglo XII en o documento d'a donación d'una pardina situada chunto a la puerta d'os Banyos que fa Remón Berenguer IV a un tal Zecrí. Pero II concede a os suyos habitants o dreito a adquirir heredaz chudievas en 1208, incorporando-se ista chudería en l'anyo 1257 a la nomina d'alchamas que tributaban a la corona regularment. En 1271 Chaime I, permite a ubridura d'un acceso por a parti nordoccidental d'a muralla.
En 1320 os pastorells, un movimiento mesianico procedent d'o Meyodía occitano, asecha a chudería de Monclús, fendo-ie una mortalera, lo que fa que os chudieus de Balbastro s'alticamen y busquen protección enzarrando-se en a zuda. Con as alteracions de 1391 se veyió paralizada l'actividat economica d'a chudería, encara que no plegó a estar asechada como ocurrió en o caso d'a chudería de Tamarit de Litera.
En primerías d'o sieglo XV teneba una población de 45 familias, entre 180 y 200 habitadors, que encara puyaría en as primeras decadas d'o siguient sieglo. En o censo de 1404 os chudieus representaban encara un 21,5% d'a población de Balbastro.
Imáchens
Bibliografía Guía de las juderías de Aragón. Un apasionante recorrido por el Aragón judío. Miguel Ángel Motis Dolader. Guías Turísticas Prames.
Vinclos externos
Los judíos de Barbastro. Sfarad.es La judería de Barbastro en la provincia de Huesca. Biblioteca Sefarad.
Balbastro Categoría:Historia de Balbastro