Boca Juniors ye un club profesional de basketbol d'Archentina, fundau en 1929. O club ye a sección de basketbol d'o Club Atlético Boca Juniors y actualment compite en a maxima categoría d'o basketbol archentino, a Liga Nacional de Básquet (LNB).
Boca Juniors ha conquistau cinco titols d'a Liga Nacional de Básquet, ueito copas nacionals y cuatre campionatos internacionals.
Historia A sección de basketbol d'o Boca Juniors estió fundada oficialment o 3 d'abril de 1929 en o barrio de La Boca, en Buenos Aires. A moniquet se convertió en una d'as seccions mas importants d'o club y en un d'os clubs de basketbol mas exitosos d'a historia d'Archentina. Dende 1990, l'equipo compite de forma continuada en a Liga Nacional de Básquet (LNB), a maxima categoría d'o basketbol archentino, sin haber descendiu mai a una división inferior.
Os primers anyos (1929–1984) Mientres os anyos 1940 y 1950, Boca Juniors estió un d'os equipos mas fuertes de l'Asociación de Baloncesto de Buenos Aires. Gracias a lo gran livel d'a suya plantilla, lo club recibió l'embotada d'Equipo de las Estrellas («Equipo d'as Estrelas») y se consolidó como un d'os clubs con mas tradición d'o basketbol archentino en a etapa amateur y semiprofesional.
En 1963, o club conquerió lo Campionato d'Archentina de Clubs, que en ixas envueltas yera la competición nacional de mayor prestigio. Mientres a suya era amateur, Boca Juniors ganó tamién mas d'una vintena titols rechionals y nacionals, convertindo-se en un d'os clubs mas influyents d'o país.
Incorporación a la Liga Nacional Con a creación d'a Liga Nacional de Básquet en 1985, Boca Juniors partecipó en diferents categorías d'a competición. En 1990 consiguió establir-se de forma permanent en a maxima categoría. Dende alavez, o club no ha descendiu mai d'a LNB y ye un d'os clubs archentins con mas temporadas consecutivas en a división d'honor.
La Bombonerita O 29 de chunio de 1996 s'inauguró o Luis Conde Arena, mas conoixiu por a suya embotada de La Bombonerita. O pavillón, situau chunto a l'Estadio Alberto J. Armando, substituyó a l'anterior pista de basketbol d'o club y ye dende alavez a casa d'o Boca Juniors.
O primer titol d'a Liga Nacional En a temporada 1996–97, baixo la dirección d'o entrenador Julio Lamas, Boca Juniors venció en a final d'a LNB a l'Independiente de General Pico por 4–1 y conquerió por primera vegada en a suya historia lo campionato d'Archentina.
L'equipo campión contaba con chugadors como Byron Wilson, Jerome Mincy, Sebastián Festa, Luis Villar y Ariel Bernardini.
A edat d'oro (2002–2007) O periodo entre 2002 y 2007 ye considerau como lo mas exitoso d'a historia d'o club.
En ixe tiempo, Boca Juniors ganó cinco Copas d'Archentina consecutivas (2002, 2003, 2004, 2005 y 2006), establindo un rechistro historico en a competición. En 2004, baixo la dirección de Sergio Hernández, o club conquerió tamién os titols d'o torneyo Top 4 y d'a Liga Nacional de Básquet.
Amás, entre 2004 y 2006 ganó tres veces consecutivas o Campionato Sudamericano de Clubs, igualando lo rechistro de mas titols en iste torneyo. En a temporada 2006–07, con Gabriel Piccato como entrenador, Boca Juniors conquerió lo suyo tercer titol d'a LNB.
Periodo de transición Dimpués de 2007, Boca Juniors continó estando un d'os equips mas competitivos d'Archentina, encara que tardó bels anyos en recuperar o titol de campión nacional. En ixe periodo o club partecipó regularment en os play-offs y en cuantas competicions internacionals.
O retorno a la cimbrera En a temporada 2023–24, baixo la dirección de Gonzalo Pérez, Boca Juniors derrotó a l'Instituto de Córdoba por 4–2 en a final d'a LNB y conquistó o suyo cuatreno titol d'a Liga Nacional.
En a temporada 2024–25, o club venció una atra vegada a l'Instituto de Córdoba en a final (4–3) y se proclamó campión d'Archentina por segunda temporada consecutiva, feito que mai no habeba conseguiu d'antes mas. En iste mesmo periodo conquerió tamién a Supercopa d'a Liga de 2024 y o torneyo Super 20 de 2025.
Exitos internacionals En a temporada 2025–26, Boca Juniors conquerió por primer vegada en a suya historia la Basketball Champions League Americas (BCLA). Iste titol estió lo cuatreno trofeu internacional d'o club y refirmó la suya posición como un d'os clubs de basketbol mas laureaus d'Archentina y d'o continent americano.
Palmarés Competición Títols Anyos Competicions nacionals Liga Nacional de Básquet 5 1996–97, 2003–04, 2006–07, 2023–24, 2024–25 Campionato d'Archentina de clubs 1 1963 Copas nacionals Supercopa d'Archentina 1 2024 Super 20 1 2025 Copa d'Archentina 5 2002, 2003, 2004, 2005, 2006 Top 4 1 2004 Competicions internacionals Basketball Champions League Americas 1 2025–26 Campionato Sudamericano de Clubs 3 2004, 2005, 2006 Referencias
Referencias
Vinclos externos
Bocajuniors.com.
*