L'aragonés occidental ye l'aragonés que se charra en bellas vals occidentals y en o Prepireneu y Depresión Meya Pirenenca a o sud d'estas vals. En un sentiu amplo (y sin parar cuenta en a propuesta de clasificación d'as parlas altoaragonesas en cuatre brancas), l'aragonés occidental tamién comprendería l'aragonés d'a cuenca d'o Galligo, (o tensino con o panticuto, l'aragonés d'a Tierra de Biescas, l'aragonés de Sobrepuerto y l'aragonés d'o Sarrablo),

Fonetica Sonorización d'as oclusivas xordas intervocalicas latinas, con casos de conservación d'estas oclusivas xordas como gramito, espata y raposa, que no tienen por qué estar chenerals y que pueden presentar continación territorial en l'gascón pirenenco. Cuasi no quedan casos de sonorización dezaga liquida, como en chungo. Por o suyo aislamiento mes gran l'ansotano y o cheso conservan millor que as atras parlas occidentals variants foneticas arcaicas como sartana u diferents de l'aragonés cheneral como arreguir (reyir en chaqués y atras variants).

Morfolochia Participios en -au, -iu. Pronombres personals plurals de 1º y 2º persona nos y vos igual que en aragonés medieval. Pronombre personal de dativo li, lis. Se conserva a particla pronomino-adverbial de locativo, y conserva a suya -b- latina: IBI > bi A morfolochia aragonesa se conserva bien en especial en Ansó y Echo.

Lexico Trobamos palabras diferents de las d'as vals orientals y que gosan plegar dica Tena, Biescas y Guarguera. Se clava entre parentesi os equivalents en aragonés oriental pa que se pueda fer a comparación: Almadía (navata), aloraNAGORE LAÍN, Francho, Lingüistica Diatopica de l'Alto Aragón. Cómo ye l'aragonés de cada puesto: carauteristicas, bibliografía, testos, mapas; Publicazions d'o Consello d'a Fabla Aragonesa, 2013. ./allora (alavez), beroyo (bonico), canaril y calderizo (cremallo), chimorriar/chimorriar-se (sulsir/sulsir-se), clamar/clamar-se (decir/decir-se), cochín (tocín), corniza (tizón), cubilar (mallata), fablar (parlar), fraxín, gaimar (ploramiquiar), gainada (tranco), melón (taixón), milloca (panizo), ovella (uella), paxaro (paixaro/muixón), emplir/umplir (plenar).

S'emplega bella exprisión diferent que en a zona oriental: A ormino (y no pas a sobén).

Anque i hai un lexico propio de l'aragonés occidental, as buegas no son claras y i hai puestos y dica comarcas do ye tipico lo solapamiento d'elementos de lexico occidental con atros de lexico oriental, como Sobrepuerto y a Guarguera.

Variedaz Aisino. Ansotano. Aragüesino. Chaqués. Cheso.

Referencias

Bibliografía Francho Chabier Nagore Laín: El Aragonés Hoy. Ibercaja y Consello d'a Fabla Aragonesa, 1989. Anchel Conte et al.: El aragonés identidad y problemática de una lengua. Colección Aragón. Librería general. Chabier Tomás Arias: El aragonés del biello Sobrarbe. Instituto de Estudios Altoaragoneses, 1999.

*