La tenencia yera una institución medieval exclusiva de lo reino d'Aragón que amaneixió en lo sieglo XI y duró dica fins de lo sieglo XII. Consistiba en lo mandato que exerceba un noble sobre castiello y la suya redolata en nombre de lo rei. En ixe territorio lo "tenent" feba de delegato politico y exerceba funcions administrativas, fiscals y chudicials.
Lo sistema de tenencias representa la primera organización administrativa de lo reino. Enantes lo papel d'organización territorial lo constituiban los monesterios de lo periodo condal. La suya desaparición a fins de lo sieglo XII se produció porque yera cara pa lo rei. D'esta traza Alifonso I lo Batallero creyó una institución menos costosa: la comunidat d'aldeyas.
Historia Lo reino d'Aragón dende lo sieglo XI yera costituito tanto por terra regis (en latín "tierra de lo rei") como por honor regalis (en latín "honor reyal"). La terra regis la formaban circumscripcions politicas que, china-china y por procesos diferents, heban esdevenito propiedat de lo rei: Aragón, Sobrarbe y Ribagorza, primero, y lo reino de Zaragoza dimpués. La relación de lo rei con los habitadors de cadaguna d'ellas yera diferent, y tamién conservoron la suya tradicional estructura interna. La honor regalis la formaban bellas circumscripcions territorials que lo monarca gosaba entregar a los barons pa que las administrasen en nombre suyo. Tamién s'adibioron en la "honor reyal" un camatón de biens de diferents clases como monesterios, ilesias, menas, salinas, molins y diferents tierras.
Lo rei yera obligato a asegurar que los suyos barons tenesen una vida digna, encara que estos lo compensaban con la suya aduya melitar. La traza que teneba lo rei pa compensar mes a sobent d'aduya melitar de los suyos barons yera la entrega de biens, clamatos honors, que formaban parte de la honor regalis, ye dicir, los nobles "teneban" la tierra u a vegatas una función publica en ella, en nombre de lo rei, y por ixo se clamaban "tenents" (en latín tenentes).
La tenencia no yera només que un castiello, gosaba comprener tamién un territorio arredol que en dependeba. En ixe territorio los tenents feban de delegatos politicos, y exerceban funcions administrativas, fiscals y chudicials.
Los monesterios heban asegurato la estabilidat socioeconomica interna de los condatos en los sieglos anteriors a lo XI, a mes de lo suyo sinyal relichioso y cultural, pero las tenencias costituyirán d'astí entabant a primera organización administratiba de lo reino.
Esta institución, amanixita en lo sieglo XI, perduró dica finals de los sieglo XII, porque yera cara pa lo rei, y Alifonso lo Batallero creyó atra institución menos costosa pa él: la comunidat d'aldeyas.
Los tenents, a qui la documentación clama tamién a sobent como seniores u tenentes locum, y no tan a sobent presidentes, mandantes, potestades, dominantes u dominatores, preboron de fer que as suyas honors estasen hereditarias, d'una traza que no ye estranio que dica quan s'acotoló la linia masculina u en las minorías d'edat, las mullers exerzan una u bellas tenencias a la vegata. Como s'ha demostrato, en reyalidat los tenents de lo sieglo XI y primera mitat de lo sieglo XII dioron orichen a lo naiximiento de la primera nobleza aragonesa. A nacionalidat d'orichen de los tenents que i heba en Aragón podeba estar muito diverso. Asinas n'i heba tenents gascons, lengadocians, navarros, catalans, etc.. y en atras tierras podeba haber-ie nobles aragoneses en institucions equivalents como la veguería catalana.
Las relacions entre lo rei y los tenents suyos yeran bien regulatas. Si lo rei no podeba revocar la tenencia menos por causas chustas (entre ellas la infidelidat y la tradición), lo tenent teneba la obligación d'estar-li fidel, aconsellar-lo, servir-lo militarment, esfender las fortalezas encomanatas y protecher lo reino. Lo senior u sinyor por la parte suya, teneba lo dreito d'espleitar la honor, percibindo las rendas de la tierra y los dreitos de chusticia, a parte d'atras muitas.
La importancia militar y defensiva de las tenencias cambeyó, como ye normal, asinas como abanzaba la reconquiesta. Una tenencia en la tierra de muga u extremadura esdebeniba interior con lo tiempo. La mayor parte de los sinyors en teneban acomandatas de las dos clases. Podemos destacar como mes importants en l'Aragón actual (sin contar las tenencias que pasoron a depender de lo reino de Navarra dimpués de morir lo Batallero) as siguients:
Abizanda Agüero Alquezra Atarés Ayerbe Balbastro Belchit BielBoleya Borcha Buil Calatayú Daroca Elsón Exeya EpilaEstada Fariza Fuents Lobarre Luesia Luna Monclús MonzónMorillo de Galligo Perarruga Pina Ricla Ruesta Sos Tarazona TaustTeruel Uesca Uncastiello Urreya de Xalón Zaragoza
La lista de nombres de tenents ye interminable, pero lo suyo estudio ha permeso recostruyir arbols chenealochicos que a traviés de los dos sieglos de vichencia de la institución, cuan se formó la primera nobleza de lo reino, mos leban a la epoca de Chaime I lo conqueridor, en meyo de lo sieglo XIII. De lo sistema de tenencias amaneixioron los Galíndez, Luna, Ximénez d'Urreya, Cornel, Fortunyons, Lizana, Azagra, Eril, Azlor, Bardaxí, Calasanz, entre atros. La suya importancia politica, encara que de trazas parcials, ha estato estudiata d'alto u baxo a traviés de la documentación que bi n'ha. Queda por saper, en la mayor parte de los casos, lo poder real d'estas familias, l'acumulación de biens, por un regular en forma de tierras, lo que permitiría configurar lo inicio u antecedents de los sinyoríos aragoneses d'orichen nobiliario.
Referencias
Categoría:Edat Meya en Aragón