O francés ye una luenga romance parlata en tota Francia, Mónegue y Luxemburgo, de traza monolingüe u bilingüe, y en bellas rechions de Belchica, Suiza, Andorra y Italia (Val d'Aosta) en Europa. En America ye tamién l'idioma oficial de Canadá, Haití, Martinica, Guadalupe, Saint-Pierre y Miquelon, a Guayana Francesa y bellas comunidaz d'a isla de Dominica, Santa Lucia, a on se practica o dialecto criollo francés, se charra tamién de forma minoritaria en a Republica Dominicana, debito a la migración de haitianos en busca de millors oportunidaz, y tasamén en a rechión buegant d'o estau d'Amapá (Brasil) con a Guayana Francesa. En o continent africano s'emplega en as antigas colonias de Francia y Belchica como a Republica Democratica d'o Congo (antigo Zaire), u Congo, Burkina Faso, Senegal, Guinea, Malí, Nícher, Burundi, Ruanda, Togo, Benín, Republica Centroafricana, Gabón, Costa de Boire, Madagascar, Chibuti, parti de Seychelles, Camerún, islas Comoras, Reunión, isla Mauricio y parti de Guinea Ecuatorial, Marruecos, Mauritania, Tunicia, Alcheria, Echipto, etcetra. En Asia s'emplega de forma minoritaria en Cambocha, Tailandia, Laos, Vietnam, India y en a Polinesia francesa, Nueva Caledonya, Vanuatu y Wallis y Futuna en Oceanía. En Estaus Unius s'emplega un dialecto criollo (cajun) en o estau de Loisiana. Dica fa unas anyadas yera l'idioma diplomatico por excelencia.

Fonetica

Vocalismo O sistema vocalico de partida en a evolución dende o latín ta o francés ye o sistema vocalico d'o latín vulgar u sistema cualitativo italico que en l'aragonés y as atras luengas galorromanicas y iberorromanicas Heinrich Lausberg: Lingüistica romanica. Tomo I fonetica Editorial Gredos. pp 221-235, pp 318-320, p 417.. Manimenos as vocals d'o francés amuestran una diferent evolución pendendo si a silaba ye libre u zarrada, a l'igual que en as atras luengas d'Oil Pierre Bec: La langue occitane. Presses universitaires de France, 1973. Colection Que sais-je?, pp 18-23, p 25, pp 28-29..

A Ĭ curta evolucionó ta oi en silaba libre: SĬTE > soif ("sete"). FĬRE > foi ("fe"). PĬLE > poil ("pelo"). PĬPER > poivre ("pebre"). PĬRA > poire ("pera").

A Ē luenga latina evoluciona ta oi en silaba libre: VĒLU > voile ("velo"). HABĒRE > avoir ("haber", "tener"). HABĒBAT > avoit > avait ("heba", tercera persona singular d'o pasau imperfecto d'indicativo) Sufixo de formación vechetal -ĒTUM, -ĒTA > -oi, -oie (sufixo -et(o), -eta). CREDĒRE > croire ("creyer"). TĒLA > toile ("tela"). O diptongo oi evolucionó ta /óe/ primero, en o sieglo XIII ta /oé/, y en o sieglo XVI ya existiba una pronunciación en /uá/ que se fació normativa dimpués d'a Revolución Francesa.

A Ĕ curta latina evolucionó ta ie en silaba libre dando resultaus pareixius a los de l'aragonés: PĔDE > pied. PĔTRA > pierre ("piedra"). FĔLE > fiel. MĔLE > miel. BĔNE > bien.

As Ā luenga y Ă curta latinas se palatalizan en silaba libre convertindo-se en una e. Esto representa una d'as diferencias mes importants entre francés y occitán. MARE > mer ("mar"). PATRE > père ("padre"/"pai"). MATRE > mère ("madre"/"mai"). SALE > sel ("sal").

A Ŏ curta latina evolucionó ta eu en silaba libre: NŎVEM > neuf ("nueu"). MŎLA > meule. *CŎRE > coeur ("corazón"). FŎCU > feu ("fuego"). Se sabe que primero a Ŏ curta se convertió en una o ubierta, que dimpués diftongó en uó. O diftongo uó disimiló ta ué, que remató fusionando-se con o diftongo eu en una /ö/ que se representa ortograficament como eu, de fueras de silabas con c y g.

A Ō luenga latina en silaba libre evolucionó ta eu VŌTA > voeu ("voda"). FLŌRE > fleur ("flor"). Sufixo -ŌSO, -ŌSA > -eux, -euse (sufixo -oso). Se sabe que primero diptongó en -ou-, que dimpués se disimiló en eu, que remató fusionando-se con o diftongo ué en una /ö/ que se representa ortograficament como eu.

A Ŭ curta latina en silaba libre evolucionó ta eu: GŬLA > gueule ("morro").

A Ū luenga no amuestra evolucions diferents en situacions de silaba libre u trancada, en os dos casos se produce la suya palatalización ta /ü/ d'acuerdo con una tendencia present en o galorromance.

Consonantismo En o consonantismo destaca a lei fonetica por a que o francés y atras luengas d'oil palatalizan o fonema /K/ d'a silaba latina inicial CA-, quedando una africada representada graficament como una ch- CAPUT > chief (francés antigo) > chef (en aragonés antigo teneba o cognato "cabo"). CANE > chien ("can"). CAPRA > chèvre ("cabra"). CARRU > char ("carro"). CABALLU > cheval ("caballo"). CANTARE > chanter ("cantar"). CAMERA > chambre ("cambra").

Esto tamién s'observa en a evolución d'a cheminada latina -CC-: BŬCCA > bouche ("boca"). SICCA > sèche ("seca"). VACCA > vache ("vaca"). *BRECCA (amprau d'o francico breka) > brèche ("breca").

En francés antigo bi heba una /h/ provinient d'os chermanismos (en especial d'os franconimos), que tiene encara una influencia dimpués d'a suya desaparición impedindo a elisión y a liaison. Encara que no se pronuncia ye conoixida como h aspiré.

As consonants oclusivas intervocalicas latinas sonoras -B-, -D-, -G- y xordas -P-, -T- y -K- tienden a desapareixer: PRECARE > prier ("pregar"). NEGARE > nier ("negar"). SETA > soie ("seda").

Bi ha una epentesi de consonant-puent en os grupos consonanticos secundarios con m, n, l, ss como primer elemento, y en os grupos -m'l- y -n'l-, grupos consonanticos cambian por estar mes familiars os grupos consonanticos latinos -MBR- (en UMBRA), -STR- (en FENESTRA), u romances -ndr- (en fendre), -mbl- (en ambler) y -ngl- (en ongle). NUMERU > *NUMRO > nombre. CINERE > *CINRE > cendre. SIMULARE > *SIMLARE > sembler. ESSERE > estre > être. ESPINULA > espingle > épingle.

Bi ha un accento de frase que reemplaza l'accento tonico d'as palabras.

Ortografía

O digrafo -ou- representa o fonema /u/ dende o sieglo XIII, representando una grafía compatible entre a pronunciación real y l'anterior pronunciación en /o/ sistema vocalico d'o latín vulgar.

O digrafo -ai- representa os fonemas /ɛ/ y /e/ dende que en francés antigo tardano (zaguers d'o sieglo XIII), se produció un cambio fonetico que transformó o diftongo /ai/ de parolas como fait ("feito" < FACTUM) y palais ("palacio" < PALATIVM) en /ɛ/. En francés antigo se distinguiba parolas como fait y palais de ele ("ala"), cler ("claro"), manimenos en francés meyo los representoron como aile y clair pa dar-lis un aspecto mes pareixiu a lo latín ALA y CLARU.

O digrafo /ai/ tamién representa o fonema nasal /ɛ̃/ en parolas como sain ("sano") y faim ("fambre") que en latín teneban una A seguida de nasal y que no se desnasalizoron en francés meyo como plaine ("plana").

En cheneral no se pronuncia as consonants finals de fueras d'as C, F, L y R finals, y encara bi ha casos en que no se pronuncian:

A -l final no se pronuncia si va debant d'una consonant nasal: blanc ("blanco") y en parolas como estomac ("estomago") y tabac ("tabaco").

A -f final no se pronuncia en parolas como clef ("clau") y nerf ("niervo"). En as parellas boeuf-boeufs y oeuf'-oeufs ("buei"-"bueis" y "uego"-"uegos") se pronucia en singular pero no en plural.

A -l final no se pronuncia en parolas como cul, fils ("fillo"), gentil, persil y Renault. En cil se pronuncia pero no en sourcil ("cella").

A -r final no se pronuncia en as parolas monsieur ("sinyor"), messieurs y gars y en as parolas rematadas en -er, de fueras damer ("amargo"), cuiller ("cullara"), enfer ("infierno"), fer ("fierro"), hiver ("hibierno"), mer ("mar"), ver ("cuco"), hier ("ahier"), y fier ("orguelloso").

Morfolochía

Chenero gramatical

Os substantivos y adchectivos pueden estar masculins u femeninos.

Gosan tener chenero masculín as parolas que se refieren a animals masclos, a árbols y arbustos, a días, meses y estacions de l'anyo, a glotonimos, nombres de ciudaz, ríos y países no acabaus en -e muda, y substantivos acabaus en consonant, siempre tenendo en cuenta que bi ha muitas excepcions.

Gosan tener chenero femenino as parolas que se refieren a animals fembra, ríos y países acabaus en -e muda, festividaz y parolas acabadas en -e muda seguindo a una doble consonant.

Bi ha parolas como aide u domestique que tienen a mesma forma en masculín u femenino y la diferencia la estableixe l'articlo definiu. Tamién bi ha parolas que tienen una forma unica pa os dos sexos (un auteur, une recrue). Bi ha parolas con significaus diferents en masculín y femenino (faux, mode), y parolas con chenero diferent dependendo d'a posición u o numero gramatical (amour, orgue).

Bi ha masculins-femeninos irregulars (grec-grecque), y mesmo bi ha uns casos que o masculín y o femenino tienen oríchens etimolochicos diferents (belier-brebis, "mardano"-"ovella").

Numero gramatical

O plural se fa en francés anyadendo una -s a la parola en singular Jacky Girardet, Jean-Marie Cridlig: Panorama Plus 1 Méthode de français. Santillana, Clé International, 1996, pp 177-178. como en atras luengas romances, con a diferencia que en a historia fonetica d'o francés esta -s final s'ha deixau de pronunciar, lo que suposa que a parola singular y plural sigan homofonas. Oralment o singular y o plural homofonos se distinguen por l'uso d'os articlos que los acompanyan, que no tienen formas de singular y plural homofonas.

Bi ha plurals irregulars que no siguen a regla cheneral: Parolas rematadas en -s, -z y -x.Un repas→des repas.Un gaz→des gaz. Parolas rematadas en -al, que fan plurals en -aux:Un cheval→des chevaux ("un caballo"→"(uns) caballos").Un général→des généraux ("un cheneral"→"(uns) chenerals").Un journal→des journaux ("un diario"→"(uns) diarios"). Manimenos también bi ha plurals regulars de parolas rematadas en -al como narvals, carnavals, finals, fanals, banals. Parolas rematadas en -ail. Bi ha muitas parolas que fan o plural regular, como détail→détails, pero tamién unas cuantas que fan plurals irregulars en -aux como aspirail, bail, corail, émail, fermail, gemmail, soupirail, travail, vantail, ventail, vitrail:Un travail→des travaux ("un treballo"→"(uns) treballos"). Parolas rematadas en -ou. A mes gran part siguen a regla cheneral (un clou-des clous), pero bi'n ha belunas como bijou, caillou, chou, genou, hibou, joujou, pou y ripou que fan plurals irregulars en -oux, indicaus por a regla mnemotecnica Viens mon petit chou sur mes genoux, ne fais pas joujou avec mes bijoux, jette plutôt des cailloux à ce vieux hibou plein de poux.:Un genou→des genoux ("un chinollo"→"(uns) chinollos").Un pou→des poux ("un piollo"→"(uns) piollos"). As parolas rematadas en -eu, -au y -eau fan plurals irregulars en -aux, de fueras de bleu, pneu, feu, émeu, landau, sarrau y o peix lieu. Un neveu→des neveux ("un sobrino"→"(uns) sobrinos").Un chapeau→des chapeaux ("un sombrero"→"(uns) sombreros"). Bi ha parolas muito diferents en plural: Un oeil→des yeux ("un uello"→"(uns) uellos").

Articlos

En francés bi ha tres clases d'articlos: definius, indefinius y partitivos. Ludivine Glaud, Yves Loiseau, Elise Merlet: Grammaire essentielle du françáis. B1. Les Éditions Didier, 2015, pp 14-19, p 223. Una diferencia entre l'articlo definiu y l'articlo partitivo ye que l'articlo definiu se refiere a una totalidat y l'articlo partitivo se refiere a una part d'esta totalidat. Si se dice Le lait est bon pour la santé mos referimos a la leit en cheneral, en total; si se dice Buvez du lait se'n refiere a una part y no a la totalidat d'a leit.

Articlos definius

Os articlos definius (le, la, les), se fan servir debant d'un substantivo como cualquecosa cheneral, determinada, bien conoixida por toz:Le vin que nous avons bu: "O vin que hemos bebiu".

Articlos indefinius

Os articlos indefinius (un, une, des), se fan servir con sustantivos contables como indeterminaus. Puede indicar cuantidat:Il achète un livre: "Él compra un libro".Il achète des livres: "Él compra uns libros".

Articlos partitivos

Os articlos partitivos (du, de la, des), se fan servir con substantivos incontables:Je mange de la salade avec de l' huile, du vinaigre et des épices.