Emil Jannings (nombre artistico de Theodor Friedrich Emil Janenz), estió un actor alemán d'orichen suizo, naixito o 23 de chulio de 1884 de Rorschach (Cantón de Sankt Gallen) y muerto o 3 de chinero de 1950 en Strobl (Salzburgo, Austria). Activo en o cine austriaco y en o cine alemán dende prencipios d'os anyos 1910, recibió cuantos premios mientres a suya carrera cinematografica.
D'entre as suyas muitas cintas, se puet citar Nächte des Grauens (1916, Richard Oswald y Arthur Robison), Anna Boleyn (1920, Ernst Lubitsch), Das Wachsfigurenkabinett (1924, Paul Leni), Faust - Eine deutsche Volkssage (1926, F.W. Murnau), The Way of All Flesh (1927, Victor Fleming), The Last Command (1928, Josef von Sternberg), Der blaue Engel (1930, Josef von Sternberg), u Ohm Krüger (1941, Hans Steinhoff).
Carrera Prencipió a suya carrera cinematografica en 1914 en o cine alemán mientres o cine mudo, esdvenindo una estrela d'ixas envueltas en o cine alemán, treballando ta la UFA GmbH, dica que en 1926 se trasladó enta los Estaus Unius ta treballar en o cine estausunidense, a on i tenió una destacada participación dica que plegó o cine sonoro, a on prencipioron os suyos problemas. Teneba un accento alemán muit marcau (encara que o suyo pai yera estausunidense) y ixo fació que en bellas cintas sustituyisin on suyos dialogos y li doblasen la voz. Alavez optó por retornar enta Alemanya, cuan o nazismo yera en ascenso en o país.
A diferencia de astras estrelas d'o cine alemán, que albandonoron Alemanya en plegar Adolf Hitler en o poder y establir o Tercer Reich, Emil Jannings prefirió permanixer en o país y, a mas, amostró a suya afinidat con o nuevo rechimen y con o suyo programa politico. Ixo fació que continase con a suya carrera cinematografica en Alemanya, mesmo convertindo-se en director d'a productora UFA GmbH y recibindo alabanzas de Joseph Goebbels, o ministro de Propaganda nazi. Por ixo, cuan en 1945 remató a Segunda Guerra Mundial con a redota d'o nazismo, a suya carrera cinematografica remató de raso, y Emil Jannings se retiró d'o cine dica morir poco dimpués como consecuencia d'un cáncer de figado.
Premios Emil Jannings recibió un premio Oscar a o Millor Actor en 1928 por o suyo papel en as cintas The Last Command, de Josef von Sternberg, y The Way of All Flesh, de Victor Fleming. Ye o primer Oscar que se concedió.
Filmografía