Vicente García Riestra foi un activista antifascista asturianu.
Biografía Na guerra civil española, y tres l'asesinatu del so padre y el so hermanu per parte de les tropes sublevaes, fuxó a Barcelona y darréu a Francia. Ellí collaboró cola resistencia francesa, motivu pol cual foi deteníu, torturáu pola Gestapo y deportáu al campu de concentración de Buchenwald, onde tuvo presu mientres un añu y mediu. Cuando lu lliberaron les tropes norteamericanes, pesaba namás 28 quilos.
Pola mor del so exiliu, retiróse-y la nacionalidá española y, tres la muerte de Franco, negóse a realizar los trámites pa recuperala yá que defendía que nun tenía por qué reclamar una cosa que yera d'él. En 1976 acabó la so situación como apátrida porque la república francesa dio-y la nacionalidá d'aquel país.
Recibió diversos homenaxes, especialmente na so Asturies natal, y l'escritor Xuan Santori recoyó la so biografía nel llibru 42.553: Después de Buchenwald. Tamién foi condecoráu cola Lexón d'Honor de Francia.
Nel momentu de morrer, yera el postreru superviviente español del campu de concentración de Buchenwald.
En 2020, el gobiernu d'Asturies dio-y la medaya d'oru d'Asturies a títulu póstumu.
Referencies
Enllaces esternos
Categoría:Medaya d'oru d'Asturies Categoría:Persones de Siero Categoría:Activistes d'Asturies Categoría:Antifranquismu