María Palmira Villa González-Río , tamién conocia como Palmita, foi una archivera y documentalista asturiana.
Trayectoria Nació en Anleo, nel conceyu de Navia, en 1913. Foi la menor de 11 hermanes y hermanos y los sos padres yeren los maestros d'instrucción primaria María del Carmen González Conde y Eduardo Villa Díez. El so hermanu Eduardo, emigrante retornáu de México, sofitó económicamente la so formación, polo que se treslladó a vivir a Madrid para estudiar el bachilleratu nel Colexu de les Hermanes Teresianes y volvió a Asturies para terminar el bachiller nel Licéu de Mieres, llogrando el títulu de Bachilleratu na Sección de Lletres pola Universidá d'Uviéu el 25 de setiembre de 1931, amás de ganar el Premiu Estraordinariu.
En 1931, matriculóse n'Hestoria na na Facultá de Filosofía y Lletres de la Universidá de Santiago de Compostela, col sofitu económicu de la so tía María.Cursó tamién asignatures complementaries d'Archivos y Biblioteques. Amás, matriculóse al empar en Maxisteriu na Escuela Normal de la Universidá d'Uviéu, carrera a la que se presentaba a los éxamenes na convocatoria de setiembre. En 1935, llogró el títulu de maestra nacional pola Universidá d'Uviéu y el grau de Llicenciada n'Hestoria pola Universidá de Santiago de Compostela.
Presentóse a les oposiciones al Archivu Municipal d'Uviéu el 5 d'abril de 1938, siendo nomada archivera del Conceyu d'Uviéu el 20 de mayu d'esi añu, con 25 años. El 28 de mayu de 1942 ocupó el cargu en propiedá.
Foi la impulsora del Taller de Restauración del Monesteriu de San Pelayo, que se convirtió en fonte d'ingresos a les monxes, y que foi consideráu unu de los meyores d'España. Formaba a nueves persones na investigación, la paleografía y el manexu de documentos antiguos no que llamóse la«Sala de los investigadores». En 1973, estableció per primera vegada n'España un sistema de valoración y selección de documentos que determinaba los que nun precisaben de caltenimientu permanente.
El 14 de xineru de 1983 se jubió tres 44 años como archivera municipal. Yá xubilada, siguió otros 9 años nel Arquivu, para poder completar el Catálogu-Inventariu del Archivu Municipal de la Ciudá d'Uviéu en collaboración con Juan Uría Ríu.
Obra Nel añu1967, publicó «El Doctor Casal en Oviedo. Médicos, cirujanos y boticarios en Oviedo en el siglo XVIII». Escribió tamién para el Boletín de Información Municipal del Excelentísimo Ayuntamiento de Oviedo artículos como «El nacimiento de la Calle del Sol» o publicaciones como «Soldados ovetenses y asturianos que acompañaron a Felipe II en su viaje a Inglaterra en 1554» o «El Ayuntamiento de Oviedo y los artífices plateros».
La so obra más conocida ye el Catálogu-Inventariu del Archvu Municipal de la Ciudá d'Uviéu, conocíu como «El Palmira». Para facelo mecanografió 11 tomos de documentación con 5.317 folios y más de 87.000 espedientes alministrativos. La primer parte del Catálogu-Inventariu publicóse en 1978 con prólogu de Juan Uría Ríu. En 1987, yá xubilada, publicó la segunda parte, con prólogu esta vegada de Manuel Fernández-Avello. En 1990, publicóse el tercer tomu , dedicáu a la colección de planos del Archivu, con prólogu d'Antonio Masip Hidalgo.
Reconocencies El trabayu de Villa foi reconociú públicamente en 1977. El Plenu del Conceyu d'Uviéu concedió-y en mayu de esi añu un votu de gracies y impúnxose-y la Cruz de los Ánxeles.
En 1982, recibió la medaya de plata de la ciudá d'Uviéu, foi nomada archivera honorífica y afayóse una placa nel so despachu nel Conceyu d'Uviéu. Ese mesmu añu , foi nomada «Asturiana del añu» pol diariu La Nueva España. El 12 de xunu de 1993, una cai d'Uviéu col so nome recibió el so nome. El 23 de febreru de 1996 ingresó nel Real Institutu d'Estudios Asturianos como miembru d'honor.
En 2011, Villa foi incluyida xuntu con Concepción Méndez-Villamil, Eva Canel, María Dolores Méndez, Eva Rodríguez, Juventina Jardón, Lourdes García Baizán, Bernardina Campoamor y Consuelo Álvarez Ledo na publicación que recueye les trayectories de muyeres relevantes nos nueve conceyos que formen el Parque Históricu del Navia. El 8 de xunu de 2018, la Área de Participación Ciudadana del Conceyu d'Uviéu rindió un homenaxe a Villa con motivu del Día Internacional de los Archivos y el 25 aniversariu de la inauguración de la cai que lleva el so nome nel barriu de Pumarín.
Referencies
Enllaces esternos
Categoría:Archiveros y archiveres Categoría:Persones de Navia Categoría:Conceyu d'Uviéu (corporación)