Marta Elola ye una historiadora, cantante y panderetera asturiana. Foi reconocida en delles ocasiones pol so llabor nel espardimientu del folclor y les músiques tradicionales. Foi la directora del Muséu Etnográficu del Oriente d'Asturies mientres una década.

Trayectoria Empecipió con 16 años na música tradicional asturiana na escuela de Xuacu Amieva. Elola llogró la llicenciatura de Xeografía ya Historia y doctoróse n'Historia Medieval. Mientres diez años dirixó'l Muséu Etnográficu del Oriente d'Asturies.

Xunió al grupu Muyeres, un colectivu de música tradicional ya investigación etnográfica, formáu por muyeres de distintos conceyos asturianos, del que darréu se convirtió en directora. Tamién collaboró con José Ángel Hevia y foi cantante del grupu Brenga Astur. Amás, formó parte de los grupos Xunos y Vezos Astures.

Impartió clases de música tradicional nes escueles Xácara d'Uviéu y Llacín, de Llanes, amás de formar a grupos interxeneracionales en delles llocalidaes del oriente d'Asturies. Davezu utiliza preseos tradicionales como la pandereta, el panderu, el tambor, el bombu y la caxa.

Participó en mayu de 2025 nel actu institucional con motivu del Día del Exiliu entamáu pol Ministeriu de Política Territorial y Memoria Democrática n'Avilés, nel que se rindió homenaxe a les neñes y neños de la guerra. Interpretó'l cantar «Gallo negro, gallo rojo» de Chicho Sánchez Ferlosio.

Reconocencies N'ochobre de 2022 foi reconocida col Premiu Muyer Rural del Oriente que recibió nun actu na Casa de Cultura del Valle de San Jorge, en Nueva. El colectivu Feminista de Muyeres Rurales del Oriente reconocióla pola so enseñanza del folclor y la música tradicionales. En 2023, recibió el VII Premiu de l'Asociación d'Artesanos de Colunga pol so llabor nel espardimientu y sofitu a la cultura y tradiciones d'Asturies.

Tamién recibió en 2025 unu de los Premios Muyer del Conceyu de Llanes, galardones que na so edición númberu XXV reconocieron a un total d'once muyeres del conceyu

Referencies

Enllaces esternos

Categoría:Cantantes d'Asturies Categoría:Persones de Llanes