Gales (en galés Cymru) ye una nación del Reinu Xuníu que s'alluga al oeste de la islla de Gran Bretaña, onde llenda al oriente con Inglaterra y al occidente colos mares d'Irlanda y Célticu del Atlánticu. Tien una población total de tres millones de persones y ye un país billingüe, siendo les sos llingües oficiales el galés y el inglés.
Ye una de les naciones celtes y tien una identidá cultural de so que surdió tres la retirada de los romanos de Gran Bretaña. La derrota de Llewelyn por Dubardu I nel sieglu XIII finó la conquista anglonormanda de Gales y significó el comienzu de sieglos d'ocupación inglesa.
En 1216 Llywelyn el Grande fundó'l Principáu de Gales. A principios del sieglu XV, ye dicir, cien años dempués de la conquista inglesa, Owain Glyndwr restauró brevemente la independencia definiendo el calter modernu del país.
El país incorporóse a Inglaterra pol Estatutu de Rhuddlan de 1284 y más sero pol Acta de Xunión de 1536, creando la entidá llegal güei conocida como Inglaterra y Gales. Nel sieglu XIX desendólcose una política llariega. En 1955 escoyóse a Cárdif como capital y en 1999 creóse l'Asamblea Nacional de Gales, qu'atiende asuntos internos. El so cabezaleru de gobiernu ye'l Ministru Principal (First Minister).
La capital y ciudá más grande ye Cárdif (en galés: Caerdydd; en inglés: Cardiff), con 320 000 habitantes.
Etimoloxía
El nome inglés de Gales, Wales, remanez del anglosaxón Walas o Wealas (el país de los welsh, 'forasteros'), probablemente de la raíz xermánica *walhaz, que quier dicir «estranxeru non xermánicu». El nome nativu, Cymru, foi adautáu baxo la forma Cambria nel llinguax inglés poéticu.
Referencies
Enllaces esternos
Portal Oficial del País de Gales Gobiernu de Gales Asamblea Nacional de Gales
* Categoría:Naciones celtes