Shuhada' Sadaqat (previamente Magda Davitt; nacida Sinéad Marie Bernadette O'Connor; ), conocida profesionalmente como Sinéad O'Connor, foiuna cantante y compositora irlandesa qu'empezó a tener nomadía dende finales de la década de 1980 col so discu debut The Lion and the Cobra. O'Connor llogró un ésitu mundial en 1990 cola versión de la canción de Prince Nothing Compares 2 U.
Dende entóncenes, a la par que facía la so carrera musical, foi parte de delles polémiques, por mor de les sos opiniones y fechos, como por exemplu la so ordenación como sacerdotesa magar ser una muyer de tradición cristiano católica, y les sos fuertes opiniones esplícites sobre la relixón organizada, los derechos de la muyer, la guerra y los abusos infantiles.
Amás de nueve discos, el so trabayu inclúi abondosos singles, canciones pa películes, collaboraciones con otros artistes y apaiciones en conciertos benéficos.
Primeros años Sinéad O'Connor nació en Glenageary nel condáu de Dublín y llamáronla asina por Sinéad de Valera, la muyer del presidente irlandés Éamon de Valera y madre del médicu qu'aidó na so nacencia, y por Santa Bernadette de Lourdes.Dermott Hayes, Sinéad O'Connor: So Different, Omnibus Press, 1991 Ye la tercera de cinco hermanos, siendo estos Joseph, Eimear, John, and Eoin O'Connor. El primeru, Joseph O'Connor, ye novelista.
Los sos pas son Sean O'Connor, un inxenieru estructural que se convirtió llueu n'abogáu y presidente del Divorce Action Group ("Grupu d'Aición de Divorciu"), y Marie O'Connor. La pareya casó mozo y tuvieron una rellación problemática, separtándose cuando Sinéad tenía ocho años. Los trés fíos más grandes marcharon pa cola madre, au O'Connor diz que sufrieron abusos físicos frecuentes. La so canción Fire on Babylon trata sobre los efeutos que tuvo l'abusu infantil nella, y enfótase constantemente na defensa de los neños maltrataos. Los esfuercios de Sean O'Connor p'asegurase la custodia de los fíos nun país que negaba davezu la custodia al proxenitor masculín y prohibía'l divorciu, motivó-y p'algamar la presidencia del Divorce Action Group y convertise en voceru destacáu. Llegó a aldericar inclusive cola so muyer sobro'l tema nun programa de radio.
En 1979, O'Connor dexó la madre y marchó vivir pa col padre y la so nueva muyer. Sicasí, a los 15 años, por mor de furtos en tiendes y de deserción escolar, lleváronla a ingresar per dieciocho meses nun reformatoriu, nel Centru de Formación Grianán, unu de los Magdalene Asylum, escueles dirixíes poles Hermanes de Nuestra Señora de la Caridá. Foi ellí onde medró na escritura y na música, anque frustrada pola conformidá impuesta. Ellí, los estudiantes maquileros yeren llevaos dormir al sanatoriu llenderu, una esperiencia sobre la que más llueu diría que «Yo nunca nun esperimenté –y probablemente más nunca esperimentaré- una medrana tala nin horror nin agonía sobre más nada».Rolling Stones, April 1988
Ún de los voluntarios nel Grianán yera la hermana de Paul Byrne, batería de la banda In Tua Nua, qu'ascuchó a O'Connor cantar Evergreen, canción de Barbra Streisand. Grabó una canción con ellos titulada Take My Hand pero decidieron que nun podía xunise a la banda porque yera mui moza (daquella, 15 años).NME, 29 October 1988
En 1983, el so padre mandóla al Newtown School, un internáu esclusivu cuáqueru en Waterford, colexu con una atmósfera más permisiva que'l Grianán. Cola aida y el puxu del Joseph Falvey, el so profesor de llingua irlandesa, grabó una maqueta de cuatro canciones, con dos canciones versionaes y les otres dos propies d'ella, qu'apaeceríen nel so primer discu.
Por un anunciu qu'inxertó na revista Hot Press, a mediaos de 1984, pudo conocer a Colm Farrely. Xuntos atroparon más xente y formaron una banda nomada Ton Ton Macoute. La banda treslladóse a Waterford per pocu tiempu, mientres O'Connor estudiaba nel colexu Newtown, pero abandonólu ensiguida y siguiólos hasta Dublín, onde les sos actuaciones recibieron crítiques positives. L'interés de Farrelly poles músiques del mundu inspiró'l son de la banda, anque la mayoría del so públicu piensa que'l rasgu más destacáu d'ellos yera la manera de cantar de Sinéad O'Connor y la so presencia nel escenariu.Jimmy Guterman, Sinead: Her Life and Music, Warner Books, 1991
El 10 de febreru de 1985 muerre n'accidente de coche la madre d'O'Connor, fechu que la dexa enforma cuitada magar la so rellación tirante. Llueu d'esto dexa la banda, que permaneció xunida magar les declaraciones contraries d'O'Connor n'entrevistes posteriores, y treslladóse pa Londres.
Carrera musical
Años 80 Los díes d'O'Connor como cantante en Ton Ton Macoute llamó l'atención de la industria discográfica, y foi contratada finalmente por Ensign Records. Tuvo como manager a Fachtna O'Ceallaigh, antiguu direutor de Mother Records, discográfica creada por U2. Xusto depués de ser contratada, O'Connor embarcóse nel so primer gran trabayu, que foi poner voz na canción Heroine, escrita xunto al guitarrista de U2, The Edge, pa la banda sonora de la película Captive. O'Ceallaigh, que fore despidíu por U2 por quexase d'ellos nuna entrevista, tenía'l vezu de ser enforma francu nos sos puntos de vista sobre la música o política, vezu qu'adoptaría tamién O'Connor; asina, la irlandesa defendió les aiciones del IRA Provisional, y dixo que la música de U2 yera "grandona"[ Allmusic bio]. Mas sero desdíxose de los comentarios sobre l'IRA diciendo que taben basaos en tontaes, y qu'ella yera "bien moza p'atalantar afayadizamente la difícil situación d'Irlanda del Norte".Sinead O'Connor Takes Back Pro Ira Comments; consultáu: 02/11/2014.
Les coses yeren tamién polémiques nel estudiu. Sinéad empareyóse col veteranu productor Mick Glossop, del que se burllaría públicamnete más tarde. Teníen diferentes visiones sobre'l so discu debut y les grabaciones feches foron refugaes depués de cuatro meses de trabayu. Demientres quedó embaranzada de John Reynolds, el so batería (que marchó tocar a la banda Transvision Vamp). Por mor sobre too de la llabia d'O'Ceallaigh, la discográfica permitió qu'O'Connor produciera'l so propiu álbum, magar daquella tuviere 20 años y tuviere embaranzada de siete meses.
The Lion and the Cobra nun foi recibíu mui bien pola corriente dominante de la música pop, pero l'álbum llegó a ser discu d'oru y foi nomada nos Grammy (Meyor voz femenina de rock). El single Mandinka foi tou un ésitu nes radios universitaries de los Estaos Xuníos, y I Want Your (Hands on Me) tuvo tamién una bona acoyida tanto nos ambientes universitarios como urbanos col remix fechu pol raperu MC Lyte. Na so primer apaición na televisión norteamericana, O'Connor cantó Mandinka nel programa "Late Night with David Letterman", en 1988. La canción Troy publicóse tamién como single nel Reinu Xuníu y n'Irlanda. Un remix disco d'ésta convertiríase nun hit dance perimportante nos EXA en 2002.
Años 90 Los dos primeros discos d'O'Connor (The Lion and the Cobra, de 1987, y I Do Not Want What I Haven't Got, de 1990) llamaron enforma l'atención y consiguió munches crítiques positives. Afalagóse la so voz y les sos canciones orixinales. Emponderóse tamién el so aspeutu: la so cabeza afaitada como seña d'identidá, davezu con una espresión enfadada, y vistida a vegaes con ropa poco corriente nin atopadizo.
En 1989 O'Connor xuntóse con Matt Johnson, líder del grupo The The, como vocalista invitada nel álbum Mind Bomb, faciendo un dúu en Kingdom of Rain.
Nel álbum I Do Not Want What I Haven't Got apaez el so ésitu internacional Nothing Compares 2 U, una versión de la canción escrita por Prince y grabada y producida orixinalmente pola banda d'ésti, The Family. La canción taba sofitada amás pol videu antolóxicu fechu por John Maybury, que consistía práuticamente nun planu de la cara de Sinéad cantando la canción, y se convirtió nun ésitu a nivel mundial, algamando'l númberu 1 en bien de países. N'Irlanda algamó'l primer puestu en xunetu de 1990 y caltendríase per once selmanes; ye l'ochenu single más esitosu de la década. Tevo un ésitu asemeyáu nel Reinu Xuníu, fincándose nel númberu 1 per cuatro selmanes, y n'Alemaña per once. N'Australia algamó'l númberu 1 nel Top 100. Tamién consiguió'l puestu númberu 1 nel Billboard Hot 100 nos Estaos Xuníos. Sinéad foi nomada pa dellos Grammy, como'l de meyor discu del añu y el de meyor voz pop femenina. Finalmente ganó'l Grammy al meyor álbum de música alternativa, anque boicotió la entrega del premiu.
Hanck Shocklee, miembru del grupu Public Enemy, fixo un maxisingle col siguiente single del discu, The Emperor's New Clothes, que se xuntó col funk célticu de la canción I Am Stretched On Your Grave. Anterior pero incluyida en I Do Not Want What I Haven't Got foi Jump in the River, qu'apaeciera orixinalmente na banda sonora de Married to the Mob; la versión maxisingle incluyía un remix fechu por Karen Finley. Tamién en 1990, O'Connor participó en Hush-a-Bye Baby, una pequeña cinta independiente irlandesa rodada en Derry y dirixida por Margo Harkin.
En 1990 participó xunto a otros munchos artistes invitaos nel espectáculu masivu The Wall, organizáu en Berlín por Roger Waters, exmiembru de Pink Floyd. (En 1996 sería invitada de nuevo en Broken China, álbum en solitario de Richard Wright, tamién del grupu Pink Floyd). En 1991, la so realización de la canción d'Elton John Sacrifice foi emponderada como ún de los meyores trabayos nel discu tributu Two Rooms: Celebrating the Songs of Elton John & Bernie Taupin.
En 1990, participó nel álbum benéficu pol SIDA Red Hot + Blue n'homenax a Cole Porter, con una versión de la canción You Do Something to Me, discu producíu por la Red Hot Organization. En 1998, collaboraría con esta organización otra vegada, coproduciendo y actuando nel Red Hot + Rhapsody. Red Hot + Blue siguió al asoleyamientu de Am I Not Your Girl?, un álbum coles balades y les canciones d'estilu pop primitivu que sintiera demientres medraba. Tamién en 1992, participó nel discu Us de Peter Gabriel, poniendo los coros nes canciones Come Talk To Me y Blood of Eden.
Tamién en 1990, foi criticada tres d'anunciar que nun actuaría si enantes de los sos conciertos se ponía l'himnu nacional norteamericanu. Frank Sinatra amenazóla con «patia-y el culu». Depués de recibir cuatro nominaciones a los Grammy, retiró'l so nome de la participación.
Depués de nueve años viviendo ente Londres y Los Ángeles, O'Connor tornó pa la so ciudá natal de Dublín a finales de 1992, pa vivir cerca de la so hermana y poder centrase na educación del so fíu Jake, que tenía daquella seis años. Nos meses vinientes dedicóse al Bel Canto asistiendo nel conservatoiru Parnell col profesor Frank Merriman. Nuna entrevista concedida al The Guardian, publicada'l 3 de mayu de 1993, dixo que les lleiciones de cantu de Merriman foran la sola terapia que recibía, describiendo a Merriman como «el maestru más increyible del universu».
Participa na banda sonora de la película de 1993 In the Name of the Father, cola canción You Made Me the Thief of Your Heart, con bien de contribuciones de Bono, líder de U2.
El so discu de 1994 Universal Mother, más convencional, nun llogró devolve-y la popularidá ente'l públicu. Tuvo de xira col festival Lollapalooza en 1995, pero tuvo de dexalu al quedar embaranzada. En 1997 publica un discu de duración menor, Golpel Oak, con canciones con arreglos acústicos. Como col anterior discu, nun recuperó la nomadía anterior. En 1994 apaeció en A Celebration: The Music of Pete Townshend and The Who, tamién conocío como Daltrey Sings Townshend. Foi un concierto de dos nueches de duración nel Carnegie Hall, producíu por Roger Daltrey, del grupu The Who, pa celebrar el so cincuentenu cumpleaños. Asoleyóse un CD y un videu VHS del conciertu en 1994, siguíos d'un DVD en 1998.
O'Connor apaeció na película de 1997 The Butcher Boy, de Neil Jordan, nel papel de la Virxe María.
Década 2000-2009