67 Ophiuchi (HD 164353 / HR 6714 / HIP 88192) ye una estrella de magnitú aparente +3,97 asitiada na constelación d'Ophiuchus.67 Ophiuchi (SIMBAD) Formaba parte de la constelación de Taurus Poniatovii, güei sumida, onde yera la estrella más brillosa. Alcuéntrase a una distancia averada de 1420 años lluz del Sistema Solar.
67 Ophiuchi ye una superxigante azul de tipu espectral B5Ib con una temperatura superficial de 13.180 K. Considerando l'absorción debida al polvu interestelar y la radiación emitida como lluz ultravioleta, 67 Ophiuchi relluma con una lluminosidá 12,100 vegaes mayor que la lluminosidá solar. Con un diámetru 21 vegaes más grande que'l del Sol, tien una masa unu 9 vegaes mayor que la masa solar. Esti últimu valor asítiase na llende ente les estrelles que rematen la so vida como una nana blanca masiva y les qu'esploten en forma de supernova. Con una edá de 26 millones d'años, anguaño alcuéntrase nun estáu de transición evolucionando escontra una superxigante colorada de tamañu enforma mayor. Ye una estrella llixeramente variable —el so rellumu varia un 0,5%— con un curtiu periodu de 2,3 díes.67 Ophiuchi (Stars, Jim Kaler)
Hasta cuatro estrelles distintes —denominaes B, C, D y E— apaecen na bibliografía como posibles acompañantes de 67 Ophiuchi. Sicasí, paez que nenguna d'elles ye una compañera real. Per otra parte, 67 Ophiuchi forma parte del cúmulu abiertu Collinder 359, que la so edá envalorada —60 millones d'años— nun ye consistente cola edá de la estrella; ye posible que Collinder 359 sía, más qu'un cúmulu, una asociación estelar, carauterizada por una unión gravitacional ente estrelles más débil.
Referencies
Categoría:Estrelles Categoría:Superxigantes azules Categoría:Estrelles variables Categoría:Constelación d'Ophiuchus