Chertan ye'l nome de la estrella θ Leonis (θ Leo / 70 Leonis),Theta Leonis (SIMBAD) la sesta más brillosa de la constelación de Leo, con magnitú aparente +3,33. Ocupa'l llugar 243 ente les estrelles más brilloses del cielu nocherniegu.
Nomes Asitiada na parte de tras del lleón, Chertan tamién recibe los nomes de Chort y Coxa. Los nomes Chertan y Chort proceden del árabe: Chertan de la pallabra al-kharātān «dos pequeñes costielles», refiriéndose orixinariamente tanto a Duhr (δ Leonis) como a la estrella que nos ocupa; y Chort de la pallabra al-kharāt o al-khurt «pequeña costiella». Pela so parte, Coxa significa «cadril» en llatín. En China yera conocida como Tsze Seang, el segundu ministru del estáu.
Carauterístiques Chertan ye una estrella blanca de la secuencia principal de tipu espectral A2V, similar a otres estrelles más familiares como Siriu, Vega o Fomalhaut. A 165 años lluz de distancia paeznos menos brillosa qu'éstes postreres al tar más alloñada. Tien una temperatura de 9250 K y una lluminosidá equivalente a 120 soles. El so radiu ye 4,3 vegaes más grande que'l radiu solar. Anque la so velocidá de rotación —23 km/s— ye enforma mayor que la del Sol, xira muncho más lenta qu'otres estrelles de la so clase, siendo el so periodu de rotación inferior a 9 díes. El telescopiu espacial Spitzer detectó escesu nel infrarroxu a 24 μm y a 70 μm, probablemente aniciáu nun discu circumestelar de polvu alredor de la estrella.
Con una edá averada de 450 millones d'años, piénsase que Chertan ta entrando na fase de subxigante. Tien una metalicidá —bayura relativa d'elementos más pesaos que'l heliu— un 45% menor que la del Sol ([Fe/H] = -0,25). Amás, ye un exemplu d'estrella con llinies metáliques con conteníos d'elementos químicos bien distintos a les solares. Asina, ye más probe n'elementos llixeros como calciu y escandiu, pero más rica n'elementos pesaos como fierro, bariu o estronciu.
Referencies
Categoría:Estrelles Categoría:Estrelles blanques de la secuencia principal Categoría:Constelación de Leo