Delta Aquilae (δ Aql / 30 Aquilae) ye una estrella de la constelación del Águila que s'atopa a unos 50 años lluz del Sistema Solar. Hasta principios del sieglu XIX formaba parte de la constelación d'Antínoo, güei refugada, asitiada al sur de l'Águila. Dacuando recibe'l nome de Denebokab, «la cola de l'águila» n'árabe.
Carauterístiques Delta Aquilae ye una subxigante mariella de tipu espectral F0IV con una temperatura superficial de 7610 K. Ye 8,9 vegaes más lluminosa que'l Sol y el so radiu ye 1,5 vegaes más grande que'l radiu solar. Xira sobre sigo mesma con una velocidá de rotación proyeutada de 88 km/s, lo qu'implica un periodu de rotación igual o inferior a 0,9 díes. Tien una masa envalorada de 1,65 mases solares.
Posibles acompañantes Tocantes a los posibles acompañantes que puede tener Delta Aquilae nun hai unanimidá al respeutu. En primer llugar paez ser una estrella binaria astrométrica, esto ye, esviaciones nel so movimientu pueden debese a una compañera. Ésta tendría un periodu orbital de 3,422 años y taría a 0,9 UA de la estrella principal. De segundes, variaciones nel espectru de la única estrella visible llevaron a pensar que Delta Aquilae yera de la mesma una binaria espectroscópica, con un periodu orbital de 3,77 hores. Sicasí, posteriores estudios achaquen estes variaciones a llixeres pulsaciones de la mesma estrella. Finalmente hai que señalar que Delta Aquilae pue ser una estrella variable Delta Scuti, con un únicu periodu midíu de 1,05 díes y una variación de namái 0,003 magnitúes.
Referencies
Delta Aquilae (Stars, Jim Kaler)
Categoría:Estrelles Categoría:Subxigantes Categoría:Estrelles variables Categoría:Variables Delta Scuti Categoría:Constelación d'Aquila