MWC 297 (RAFGL 2165 / GSC 05107-00494)MWC 297 (SIMBAD) ye una estrella de magnitú aparente +12,31 na constelación de Serpens. Conocida tamién pol so nome de variable NZ Serpentis, ye una variable de tipu Orión que'l so rellumu varia 2,63 magnitúes. Alcuéntrase a una distancia envalorada de 815 años lluz respectu al Sistema Solar.
MWC 297 ye una de les estrelles nueves masives más cercanes a la Tierra. Ye una estrella Be que la so masa envalorada ye unes 10 vegaes mayor que la masa solar. De tipu espectral B1.5V, el so rellumu ta atenuáu 8 magnitúes nel espectru visible. La so lluminosidá ye 10.700 vegaes superior a la del Sol. Tien una velocidá de rotación proyeutada bien alzada de 350 km/s.
A pesar de la gran cantidá d'observaciones llevaes a cabu, la naturaleza del oxetu y de la so redolada circumestelar nun son bien entendíos. L'alta velocidá de rotación y la esistencia d'una estructura allargada reparada en radiofrecuencies son consistentes cola presencia d'un discu de acreción, consecuencia de la formación estelar de MWC 297. La radiación infrarroxa emitida pol polvu circumestelar caliente ta confinada nuna zona compacta bien pequeña, de diámetru inferior a 1,5 UA, alredor de la estrella central; piénsase que la materia circumestelar ta entamada en forma de discu, que dende'l nuesu puntu de vista presenta un enclín moderáu. El discu nun amuesa nengún buecu a la resolución de les observaciones interferométricas realizaes.
Referencies
Categoría:Estrelles Categoría:Estrelles variables Categoría:Variables Orión Categoría:Constelación de Serpens