Ras Algethi o Rasalgethi (α Herculis / α Her / 64 Herculis) ye una estrella de magnitú aparente +3,31 na constelación d'Hércules. Alcuéntrase a 382 años lluz de distancia del Sistema Solar.
Nome El nome de Ras Algethi, procedente del árabe Ar-Rās al-Jāthīyy (الرأس الجاثي), significa «la cabeza del arrodillado». Sicasí, ente los nómades esta estrella yera conocida por Al-Kalb ar-Rāʽi (الكلب الراعي), «el perru del pastor», títulu que compartía con Ras Alhague (α Ophiuchi).
Los chinos llamaben a α Herculis Ti Tso, «l'asientu del emperador», según Tsin. Per otra parte, esta estrella y delles cercanes a ella —incluyendo a ι Herculis y κ Herculis— constituyíen el asterismu Ho, una de les midíes utilizaes en China.
Carauterístiques físiques Ras Algethi ye un sistema estelar quíntuple, que la so estrella principal, Ras Algethi A (HR 6406),Ras Algethi A (SIMBAD) ye una superxigante o xigante colorada lluminosa de tipu espectral M5II. La so lluminosidá, nel espectru visible, ye 475 vegaes mayor que la del Sol, pero si inclúyese la enerxía que la estrella emite como radiación infrarroxo, la so lluminosidá xube hasta 17.000 soles. El so radiu, 400 vegaes más grande que'l del Sol, ye de 1,9 UA; asitiada nel centru del Sistema Solar, la estrella estenderíase más allá de la órbita de Marte. Ye, amás, una variable irregular que'l so rellumu varia del orde d'una magnitú en periodos que van de meses a años. Estudios fechos per aciu interferometría amuesen que tien dos compañeres bien cercanes; la primera puédese resolver namái n'ocasiones y ta dixebrada 0,02 segundos d'arcu d'ella, ente que la segunda tardienta 10 años en orbitarla.The Webb Deep-Sky Society
Ras Algethi B (HR 6407)Ras Algethi B (SIMBAD) ta asitiada a 550 UA y emplega más de 3000 años en completar la órbita alredor de Ras Algethi A. De la mesma ye una estrella binaria, formada por una xigante mariella de tipu G5III y una nana blancu-mariella de tipu F2V. Separaes ente sí 0,4 UA —aproximadamente la distancia de Mercuriu al Sol—, tarden 52 díes en completar la órbita. Una nube de gas n'espansión, creada pol fuerte vientu estelar que sopla dende la superxigante colorada, envolubra a esta binaria.Ras Algethi (Jim Kaler, Stars)
Hai tamién dos compañeres más de magnitúes aparentes 11,1 y 15,5 a distancies respeutives de 79 segundos d'arcu y 19 segundos d'arcu, pero que paecen ser compañeres óptiques.
Ver tamién Llista d'estrelles más grandes conocíes
Referencies
Categoría:Estrelles Categoría:Xigantes coloraes Categoría:Estrelles variables Categoría:Variables irregulares Categoría:Constelación d'Hércules