Seat (π Aquarii / π Aqr / 52 Aquarii)52 Aquarii (SIMBAD) ye una estrella na constelación d'Acuariu de magnitú aparente +4,79. Xunto a Sadachbia (γ Aquarii), ζ Aquarii y η Aquarii forma un asterismu con forma de «Y» conocíu como la «Urna». Seat ye un nome que data del sieglu XVII y alude al significáu de Sadachbia como «estrella afortunada de coses escondíes».
Distante unos 1100 años lluz del Sistema Solar, Seat ye una estrella azul de la secuencia principal de tipu espectral B1Ve. Con una elevada temperatura de 26.500 K, ye una estrella Be con un discu ecuatorial caliente, consecuencia de la so alta velocidá de rotación. L'enclín del discu envalórase nunos 60º, polo que la so velocidá de rotación puede ser de 300 km/s, con un periodu de rotación d'aproximadamente 1 día. Incluyendo la gran cantidá de radiación ultravioleta emitida, tien una lluminosidá ente 15.000 y 17.500 vegaes la del Sol, siendo'l so radiu unes 6 vegaes más grande que'l radiu solar. Con una masa envalorada ente 12 y 13 mases solares, Seat ye una clara candidata para, nun futuru, esplotar como supernova. El ritmu de perda de masa estelar ye unu de los mayores reparaos n'estrelles Be (100.000 vegaes superior al del Sol), lo que fai que, xunto a la presencia del discu inestable, Seat presente pequeñes oscilaciones nel so rellumu de 0,3 magnitúes.
Variaciones nel espectru de Seat indiquen la presencia d'una estrella acompañante con un periodu orbital de 84,1 díes. La masa d'ésta última envalórase ente 2 y 3 mases solares, polo que la separación media ente dambes pue ser de 0,9 UA.Seat (Stars, Jim Kaler)
Referencies
Categoría:Estrelles Categoría:Estrelles binaries Categoría:Estrelles variables Categoría:Constelación d'Acuariu