Butastur rufipennis ye una ave rapaz perteneciente a la familia Accipitridae, del orde Accipitriformes. Forma parte del xéneru Butastur xunto col Butastur liventer, el Butastur indicus y el Butastur teesa, siendo l'únicu residente n'África. El so área de distribución toma tol continente dende'l sur d'El Sáḥara, hasta Camerún, Ruanda y Burundi pel sur.
Mide ente 34 y 44 cm de llargor, el so valumbu ye de 92-106 cm y el so pesu varia ente los 300 y 400 gr. Les femes suelen ser de mayor tamañu que los machos.
Ye un migrante parcial que se mueve a la zona sur del so área de distribución mientres l'iviernu y al norte mientres el branu (d'abril a setiembre), coincidiendo cola dómina d'agües y el so periodu de cría. Aliméntase fundamentalmente d'inseutos, especialmente de llagostes (d'ende'l so nome en castellán), a los que prinda nel suelu o tres una curtia persecución en vuelu.
El so hábitat son los grandes espacios abiertos, árees semidesértiques, sabanes, zones de monte baxu y praderíes; dende'l nivel del mar y hasta los 1200 m d'altitú. Ye una especie común nel so área de distribución y llocalmente abondosa, anque'l so númberu paez tar en regresión debíu al sobrepatoréu y la seca.
Sinonimia Buteo rufipennis
Referencies
Categoría:Butastur Categoría:Aves d'África Categoría:Aves de Camerún Categoría:Animales descritos en 1851