Sojourner Truth foi una abolicionista y activista polos derechos de les muyeres. Truth nació esclavizada, pero escapó cola fía en 1826. Depués de recurrir a los tribunales pa recuperar al fíu, convirtióse nuna de les primeres muyeres negres en ganar un xuiciu contra un home blancu. El nome de nacimientu de Sojourner yera Isabella ("Belle") Baumfree. Camudó'l so nome a Sojourner Truth en 1843. Ye bien conocida pol so discursu "Ain't I a Woman?" ("¿Nun soi yo una muyer?"), pronunciáu en 1851 na Convención de los Derechos de la Muyer d'Ohio, n'Akron, Ohio. Na Guerra de Secesión, Truth ayudó nel reclutamientu de tropes negres pal Exércitu de los Estaos Xuníos. Depués de la guerra, intentó ensin suerte consiguir concesiones de tierra del Gobiernu federal p'antiguos esclavos.
El nome qu'escoyó ye nyu simbólicu, puesto que n'inglés sojourner ye la forma axente del verbu to sojourn, que significa "morar temporalmente", mientres que truth significa "verdá". El compuestu podría interpretase, poro, como "residente temporal na verdá".
Infancia y mocedá Truth foi fía d'Elizabeth y James Baumfree (o Bomefree).Narrative (p. 10 na edición de Penguin Classics de 1998, editada por Nell Irvin Painter); tamién s'usa en Nell Irvin Painter, Sojourner Truth: A Life, A Symbol (Norton, 1996), p. 11; y en Carleton Mabee con Susan Mabee Newhouse, Sojourner Truth: Slave, Prophet, Legend (New York University Press, 1993), p. 3. El coronel Hardenbergh mercó a James y Elizabeth a comerciantes d'esclavos y caltúvolos na so familia nuna facienda conocida col nome holandés de Swartekill, na ciudá d'Esopus, nel estáu de Nueva York, a 153 km al norte de la propia ciudá de Nueva York. Charles Hardenbergh heredó la facienda y los esclavos de so padre.
Cuando Charles Hardenbergh morrió en 1806, Truth, conocida como Belle y que tenía nueve años, foi puyada nun mercáu d'oveyes por 100 dólares a John Neely, cerca de Kingston, Nueva York. Hasta esi momentu Truth namás falaba neerlandés. Demués describiría a Neely como cruel y violentu y contaría que-y pegaba a diario, llegando nuna ocasión a facelo con un manizu de vares de metal. Neely vendióla en 1808 por 105 dólares a Martinus Schryver, de Port Ewen, un taberneru que la tuvo dieciocho meses. Schryver vendióla en 1810 a John Dumont, de West Park, Nueva York. Anque'l so cuartu dueñu yera más atentu con ella, esistía una tensión considerable ente Truth y la segunda muyer de Dumont, Elizabeth Waring Dumont, que la acosaba y facía-y más difícil la vida. La primer muyer de Dumont, Sarah "Sally" Waring Dumont, hermana d'Elizabeth, morrió alredor de 1805, cinco años primero de que Dumont mercara a Truth.
Alredor de 1815, Truth namoróse d'un esclavu llamáu Robert, d'una granxa vecina. El dueñu de Robert, Charles Catton Jr., un pintor de paisaxes, prohibió la rellación. Nun quería que'l so esclavu tuviera descendencia con una esclava que nun yera de la so propiedá, porque los fíos tampoco sedríen de so. Un día Robert escapó pa ver a Truth. Cuando Catton y el so fíu lu atoparon, tundiéronlu xabazmente hasta que Dumont intervieno. Truth nunca volvió ver a Robert, que morrió a cuenta de les firíes. La esperiencia acompañaría a Truth el restu de la so vida. Finalmente casóse con otru esclavu mayor qu'ella, llamáu Thomas. Dio a lluz a cinco neños: James, que morrió mientres la infancia; Diana (1815), que so padre foi Robert o John Dumont; y Peter (1821), Elizabeth (1825) y Sophia (1826), toos nacíos depués de la unión con Thomas.
Llibertá L'Estáu de Nueva York empezó en 1799 a llexislar l'abolición de la esclavitú, anque'l procesu d'emancipación nun se completó hasta'l 4 de xunetu de 18270. Dumont comprometiérase con Truth a concede-y la llibertá un añu primero de la emancipación estatal si trabayaba bien y yera fiel. Sicasí, cambió d'opinión, alegando qu'una firida na mano fixera que fuera menos granible. Ella siguió trabayando, filando hasta 45 kg (100 llibres) d'algodón.
En 1826, Truth escapó cola fía, llamada Sophia y tuvo de dexar atrás a los otros fíos, yá que nun sedríen consideraos llegalmente llibres hasta que cumplieren les condiciones establecíes pola llei d'emancipación.
Depués espresaría:
"Nun salí corriendo, porque pensaba qu'eso taba mal; salí andando, creyendo qu'eso taba bien".
Dirixóse pa casa de Maria y Isaac Van Wagenen, que les acoyeron a ella y a so fía. Isaac ufiertóse a mercar los sos servicios pel añu que faltaba hasta que la emancipación estatal entrara a valir, lo que Dumont aceptó por 20 dólares. Truth vivió ellí hasta que la llei d'emancipación del Estáu de Nueva York entró a valir un añu depués.
Truth supo que so fíu Peter, entós de cinco años, fuera vendíu illegalmente por Dumont a un propietariu d'Alabama. Cola ayuda de los Van Wagenen llevó'l casu ante los tribunales y, depués de meses de procedimientos llegales, recuperó al fíu, que sufriere abusos per parte del so dueñu nuevu. Truth convirtióse asina nuna de les primeres muyeres negres en recurrir a los tribunales contra un home blancu y ganar el casu.
Truth tuvo una esperiencia relixosa na so estancia colos Van Wagenen y convirtióse al cristianismu. En 1829 treslladóse col so fíu Peter a la ciudá de Nueva York, onde trabayó como emplegada del llar pa Elijah Pierson, un cristianu evanxélicu. En 1832 conoció a Robert Matthews, tamién conocíu como Prophet Matthias ("el profeta Matías"), y pasó a trabayar tamién pa él como emplegada del llar na comunidá conocida como Matthias Kingdom. Elijah Pierson morrió posteriormente y Robert Matthews y Truth fueron acusaos de delitos rellacionaos cola so muerte. Dambos fueron absueltos.
En 1839, el fíu de Truth, Peter, atopó trabayu nun balleneru llamáu Zone of Nantucket. Ente 1840 y 1841, Truth recibió trés cartes d'él, anque na tercera Peter dicía que mandara cinco y que nunca recibiera nenguna de les cartes de so madre. Cuando'l barcu volvió a puertu, Peter nun taba a bordu y Truth nunca volvió saber d'él.
En 1997, el vehículu robóticu de la misión Mars Pathfinder de la NASA recibió'l nome de Sojourner n'honor a Sojourner Truth.
Referencies
Enllaces esternos
Nota xenealóxica Narrative of Sojourner Truth, autobiografía de Sojourner Truth n'inglés.
Categoría:Feministes d'Estaos Xuníos Categoría:Abolicionistes Categoría:Persones de Nueva York