Hygrocybe coccinea ye un fungu basidiomicetu pocu frecuente, de la familia Hygrophoraceae. Habita en praderíes montascoses y húmedes, y la so cogorda ye comestible, pero les guíes micolóxiques nun suelen encamentar la so recoyida por cuenta de la so escasez. L'epítetu específicu coccinea significa "de color escarlata".
Descripción La cogorda d'esti fungu presenta un sombreru muncho más pequeñu que'l so pariente H. punicea, midiendo ente 2 y 6 centímetros de diámetru. Ye campanuláu semiesféricu de primeres, y conforme madura pasa a ser campanuláu. La cutícula ye llisa y húmeda, con aspeutu ceroso, de color dende escarlata hasta coloráu sangre. Cuando la cogorda avieya, vuélvese pálida, pero caltién el color coloráu nel cantu estriáu. Les llámines, tán bien espaciaes, presenten laminuques parciales y dacuando apaecen dentaes. Son de color anaranxáu o coloráu sangre, de normal colos filos amarellentaos. El pie de cutiu ta daqué estrapáu, ye buecu y tien una testura nidia. Presenta una coloración asemeyada a la del sombreru, tomando un color anaranxáu col tiempu, y la parte más cercana al sustratu ye visiblemente más clara, de color amarellentáu, siendo una seña qu'ayuda a identificar la especie. La so carne ye del mesmu color que'l pie y el sombreru, y de testura aguacienta y fráxil, ensin golor y de sabor sutil. La esporada ye blanca.
Referencies
Enllaces esternos
coccinea
Categoría:TBSpecies