La República romana (en llatín: Rēs pūblica Populī Rōmānī, Rōma o Senātus Populusque Rōmānus) foi un periodu de la historia de Roma caracterizáu pol réxime republicanu como forma de gobiernu, que s'estiende tradicionalmente dende'l 509 e.C., cuando se punxo fin a la Monarquía romana cola espulsión del últimu rei, Luciu Tarquiniu'l Soberbiu, hasta'l 27 e.C., cuando Octavianu recibió'l títulu d'Augustu, fecha que convencionalmente marca l'entamu del Imperiu romanu.
La República romana consolidó'l so poder nel centru d'Italia mientres el sieglu V e.C. y nos sieglos IV y III e.C. impúnxose como potencia dominante de la península itálica, sometiendo o incorporando a los demás pueblos de la rexón y enfrentándose a les polis griegues del sur. Na segunda metá del sieglu III e.C. proyeutó'l so poder fuera d'Italia, lo que llevó a una serie d'enfrentamientos con otres grandes potencies del Mediterraneu, especialmente Cartago y el Reinu de Macedonia, de los que Roma salió convertida na potencia dominante de la rexón.
Nos años siguientes, siendo yá la principal potencia del Mediterraneu, Roma espandió'l so poder sobre les polis griegues; el reinu de Pérgamu incorporóse a la República y nel sieglu I e.C. conquistó territorios d'Oriente Próximu, ente ellos los últimos dominios del Imperiu seléucida. Ente finales del sieglu II e.C. y el sieglu I e.C., Roma esperimentó grandes cambeos sociales y políticos, al empar que les tensiones derivaes de la espansión territorial, les desigualdaes y la competencia poles maxistratures ente la aristocracia romana contribuyeron a una sucesión de crisis y conflictos internos. Les guerres civiles de la República tardía acabaron provocando'l colapsu del sistema republicanu y dieron pasu a una nueva etapa de la historia de Roma: l'Imperiu romanu.
Referencies
Enllaces esternos
Categoría:Roma antigua