2040 (MMXL) va ser un añu bisiestu entamáu en domingu nel calendariu gregorianu.
Fechos previstos
Fecha por determinar
Ta prevista la celebración de los Xuegos de la XXXVII Olimpiada, nuna sede entá por determinar. Dellos países y territorios manifestaron interés en presentar candidatures pa organizar los Xuegos.
2040 ye l'añu horizonte del Plan Xeneral de Bakú de 2040, aprobáu pol Gobiernu d'Azerbaixán en 2023 pa ordenar el desenvolvimientu urbanísticu de Bakú. El plan abarca los 212.300 hectárees del territoriu alministrativu de la capital y contempla actuaciones sobre ordenación territorial, tresporte, infraestructures, servicios públicos, patrimoniu y recuperación ambiental.
Ta prevista pa esti añu la finalización de la rede básica ampliada de la Rede Transeuropea de Tresporte (TEN-T) de la Unión Europea. La normativa europea establez trés horizontes pa completar la rede: 2030 pa la rede básica, 2040 pa la rede básica ampliada y 2050 pa la rede global.
El Conceyu d'Ámsterdam tien como oxetivu que los aproximadamente 650.000 edificios y viviendes de la ciudá dexen d'utilizar gas natural en 2040, como parte de la so estratexa pa algamar la neutralidá climática en 2050.
Fenómenos astronómicos
11 de mayu: va producise un eclís solar parcial, visible dende'l sur y este d'Australia, l'Antártida y zones de los océanos Pacíficu y Índicu.
26 de mayu: va producise un eclís llunar total, visible dende gran parte d'Asia, Australia, Norteamérica y América del Sur, amás de zones de los océanos Pacíficu, Atlánticu y Índicu.
4 de payares: va producise un segundu eclís solar parcial, visible dende Norteamérica, el norte d'América del Sur y zones de los océanos Pacíficu y Atlánticu.
18-19 de payares: va producise un segundu eclís llunar total, visible dende Europa, Asia, Australia, África, Norteamérica y parte d'América del Sur.
Proyeiciones científiques y socioeconómiques
Demografía
Según la variante media de les World Population Prospects 2024 de la Organización de les Naciones Xuníes, la población mundial va siguir creciendo durante la década de 2040, camín del máximu d'alredor de 10.300 millones de persones previstu pa mediaos de la década de 2080.
Enerxía
Una proyeición publicada en 2013 pola Alministración d'Información Enerxética de los Estaos Xuníos (EIA) estimaba que'l consumu mundial d'enerxía aumentaría un 56 % ente 2010 y 2040, pasando de 524 a 820 cuatrillones d'unidaes térmiques britániques (Btu). La previsión atribuyía más del 85 % del aumentu de la demanda a países de fuera de la OCDE.
Estudios sobre la enerxía solar espacial contemplen la posibilidá de que centrales comerciales capaces de recoyer enerxía solar nel espaciu y tresmitila a la Tierra puedan empezar a desplegase alredor de 2040, anque la viabilidá económica depende de reducciones importantes nos costes de llanzamientu y d'avances teunolóxicos adicionales.
Clima y salú
Modelos sobre los efeutos del cambéu climáticu na producción de polen proyectaron que les concentraciones medies podríen superar en 2040 el doble de les registraes en 2000, como consecuencia, ente otros factores, del aumentu de les temperatures y de la concentración atmosférica de dióxidu de carbonu. Los mesmos modelos prevén un adelantu de la temporada de polen.
Efemérides destacaes
10 de mayu: va cumplise'l centenariu del entamu de la producción comercial de nailon, ún de los primeros polímeros sintéticos fabricaos a gran escala.
Referencies
Enllaces esternos
Categoría:Sieglu XXI Categoría:Años futuros