La Bandina ye un grupu asturianu de música folk.
Historia
Entamaron la so andadura nel añu 1996 al envís de recrear les tradicionales bandines de los principios del sieglu XX n'Asturies, que tocaben pieces tradicionales dedicaes esencialmente al baille o reinterpretaben los últimos ésitos de la música comercial que les nacientes emisores de radio entamaben a popularizar. La Bandina les 47, foi'l nome col que se bautizaren, faciendo referencia a les 47.000 pesetes nes que presupuestaba naquel tiempu cualquier actuación l'Ayuntamientu d'Ayer. Cuando nun cartelu del Festival Folk de Plasencia'l nome apaeció acortáu simplemente a La Bandina, a los músicos prestó-yos y decidieron dexalo asina.
En 2001 asoleyen el so primer álbum, Pa baiḷḷar (FonoAstur). En xunu de 2005, nuevamente con Fonoastur, editen el so segundu trabayu discográficu, ...de romandela. Nél pue vese una pergrande evolución que lu lleva ser un ésitu ente'l públicu, siendo consideráu por dellos críticos como ún de los meyores álbumes de la historia del folk asturianu, y afitando a La Bandina como ún de los grupos más reconocíos nel panorama musical. Con esti segundu discu consiguieron algamar un soníu mui personal, contemporaneu ensin dexar de dir de la mano de lo tradicional. El mesmu diseñu de la carpeta, alloñada de la estética folki, yá fai albidrar que se trata d'un trabayu diferente a lo que se vien faciendo n'Asturies nos últimos años.
El coleutivu Bebés Furiosos fizo un video-clip del tema Na caleya que recueye perfechamente l'espíritu folixeru del cantar y de la propia formación.
La Bandina celebró n'agostu de 2006 el so décimu aniversariu nos escenarios ampliando la so formación y celebrando un conciertu especial en Xixón que quedará inmortalizáu nun CD-DVD.
El soníu de La Bandina ye realmente orixinal y estremáu de les tendencies más habituales del folk asturianu. Carauterízase pol usu d'instrumentos poco frecuentes, sobre manera la zanfona y tamién el saxofón, amás d'una batería personalizada qu'inclúi bombu, tambor, congues y darbukes. Amás, incluyen nos sos discos diverses collaboraciones vocales (ente les que destaquen les d'Anabel Santiago, y el padre de Santi, Jaime Caleya) y instrumentales.
El repertoriu de La Bandina inclúi igües de pieces tradicionales, tanto asturianes como bretones o balcániques, asina como composición propia.
Ente los escenarios de prestixu internacional que visitaron alcuéntrense'l Festival Intercélticu de Lorient (Bretaña), la Rua Viva n'Évora (Portugal), el Festival Intercélticu de Provence, (Francia), el Cornemuses d'Europe de Bourgogne (Francia) y la Fête de la Vielle d'Anost (Francia).
Componentes
Santi Caleya: gaita asturiana, saxofón, bombarda Merce Santos: zanfona David Varela: cordión, voz Pablo Pumarada: percusiones Juanjo Díaz: percusiones Dani Jiménez: baxu ellétricu Agus Lara: trompeta Toño Gómez: trombón
Antiguos componentes
Octavio Trapiella: cordión Manolo Durán: percusiones
Discografía
Pa baiḷḷar (FonoAstur, 2001) ...de romandela (FonoAstur, 2005) 13 (Ámbitu - L'Aguañaz, 2008)
Referencies
Enllaces esternos
Sitiu web de La Bandina en Myspace Na Caleya (remix) en YouTube
Categoría:Grupos de música d'Asturies Categoría:Grupos de folk d'Asturies Categoría:Cantantes n'asturianu