La bandera nacional de Sierra Lleona ye una bandera tricolor formada por trés bandas horizontales d'igual anchor y de color verde, blanca y azul. Adoptada oficialmente'l 27 d'abril de 1961 pa sustituir el Pabellón Azul británicu complementáu (defaced) col escudu d'armes de la colonia, tien sío la bandera de la República de Sierra Lleona dende qu'esta algamó la so independencia.
Historia Los británicos aportaron a tierres de l'actual Sierra Lleona en 1787, cuando un garapiellu de filántropos y abolicionistes mercaron 52 km² de tierra cerca de la islla de Bunce pa instalar ellí esclavos lliberaos, dando orixe asina a l'actual ciudá de Freetown. El territoriu convirtióse nuna colonia de la corona del Reinu Xuníu en 1808Perfil de Sierra Lleona na web de BBC News (n'inglés). Demientres el periodu colonial Sierra Lleona usó el Pabellón Azul británicu complementáu col escudu d'armes del territoriu. Esti consistía nún círculu con una ilustración na qu'apaecíen un elefante, una palmera y dellos montes, amás de les lletres iniciales del nome del territoriu, S.L.. Sacante estes lletres el restu del escudu yera idénticu al escudu d'armes de la Costa del Oru, Gambia y la colonia de Lagos. Sierra Lleona consiguió tener un escudu d'armes propiu en 1914, y so bandera basada nel Pabellón Azul camudose pa espeyar el cambiuSmith, Whitney. Flag of Sierra Leone. Encyclopedia Britannica, 2013..
En 1960 el College of Arms (institución británica d'estudios heráldicos y vexilolóxicos) propunxo, y dempués aprobó, una nueva bandera y un nuevu escudu pal país, anticipándose a la independencia de la colonia al añu siguiente. Diseñose primeru l'escudu, y los sos colores predominantes (verde, blancu y azul) foron usaos tamién después pa crear la banderaKindersley, Dorling. Complete Flags of the World, p. 81. Dorling Kindersley Ltd, 2008.. La primer vez que foi izada foi na medianueche del 27 d'abril de 1961, momentu de la independencia efectiva del territoriu. Dos años dempués el gobiernu aprobó una llei que considera illegal l'insultu a la bandera del país y a les de los países amigos.
Diseñu Los colores de la bandera tienen un significáu políticu y cultural. El verde fai referencia a los recursos naturales del país -específicamente a la so agricultura y les sos montañes- y el blancu espeya'l deséu de xunidá y xusticia. L'azul evoca el puertu natural de Freetown, la capital del país, y tamién la esperanza de que'l país pueda contribuyir a la paz mundialSmith, Whitney. Flag of Sierra Leone. Encyclopedia Britannica, 2013..
Particularidaes llegales La bandera de Sierra Lleona ye usada como bandera de conveniencia por barcos foriatos pola escasa regulación que tien el país en cuestiones del derechu marítimu. Esta circunstancia ye aprovechada por xente que quier dedicase a actividaes illegales, como la pesca fraudulenta, y tamién por barcos de países que, por tar embaxu de sanciones de les Naciones Xuníes, nun pueden comerciar si usen la bandera de so. La presión internacional llevó al gobiernu d'esti país a restrinxir l'usu del so pabellón como bandera de conveniencia. Asina, en 2010 dexó de permitir rexistrar barcos pesqueros, nún intentu d'impedir la pesca illegal tanto nes sos agües territoriales como n'agües internacionales, y en 2012 retiró diez barcos, que se pensaba que yeren de nacionalidá iranina, del so rexistru. Esto fízose de resultes de tener interceptao n'El Líbanu un barcu con bandera de Sierra Lleona que llevaba armes pa Siria.
Banderes históriques
Ver tamién Escudu de Sierra Lleona
Referencies
Enllaces esternos
Sierra Lleona Categoría:Sierra Lleona