L'añu 6 e.C. foi un añu normal entamáu en domingu o llunes nel calendariu xulianu.
Fechos
Decimu Leliu Balbu y Gayus Antistiu Vetu exercieron como cónsules de Roma. Augustu concedió-y a Tiberiu la potestas tribunicia por cinco años y encargó-y intervenir en Armenia, onde la situación política volviera inestable tres la muerte de Tigranes III.Dión Casio, Historia romana, LV, 9. Tiberiu decidió abandonar temporalmente la vida política y retiróse voluntariamente a la islla de Rodes. Les fontes antigües ofrecen distintos motivos pa esta decisión, ente ellos la tensión cola familia d'Augustu y la mala rellación cola so esposa Xulia la Mayor. Los habitantes de les Islles Baleares solicitaron ayuda a Augustu ante una plaga de coneyos que taba destruyendo les colleches. Les fontes antigües describen l'usu de furones pa sacar los coneyos de les sos madrigueres y facilitar la so captura.Pliniu'l Vieyu, Historia natural, VIII, 218. En Xudea, más de 6.000 fariseos negáronse a prestar un xuramentu de fidelidá esixíu por Herodes I el Grande. La muyer de Feroras, hermanu del rei, pagó les multes impuestes a los opositores.Flaviu Xosefu, Antigüedaes xudíes, XVII, 41-45. Según Flaviu Xosefu, dellos d'estos fariseos profetizaron que'l gobiernu de Herodes y de los sos descendientes llegaría al so fin y que'l poder pasaría a Feroras y a la so familia. Herodes respondió castigando a los implicaos y a persones cercanes a ellos. Na dinastía Han occidental, Feng Yuan, princesa viuda de Zhongshan y antigua consorte del emperador Yuan de Han, foi acusada falsamente de bruxería contra l'emperador Ai de Han y la emperatriz viuda Fu. Tres una investigación acompañada de tortures contra miembros de la so familia, suicidóse.
Nacencies
ca. 6 e.C. - Xuan el Bautista (m. ca. 30) - predicador xudíu activu na rexón del ríu Xordán y figura destacada del cristianismu y del islam. La fecha exacta de la so nacencia nun se conoz. ca. 6-4 e.C. - Xesús de Nazaré (m. ca. 30) - predicador xudíu y figura central del cristianismu. La cronoloxía histórica más habitual asitia la so nacencia nos últimos años del reináu d'Herodes I el Grande.
Muertes
Feng Yuan (n. ca. 48 e.C.) - consorte del emperador Yuan de Han y princesa viuda de Zhongshan; suicidóse tres ser acusada de bruxería durante'l reináu del emperador Ai. Liu Xiang (n. 77 e.C.) - eruditu, bibliógrafu y escritor chinu de la dinastía Han, responsable de la edición y catalogación de numerosos testos clásicos y compilador del Lienü zhuan. ca. 6 e.C. - Ban Jieyu (n. ca. 48 e.C.) - poeta, escritora y consorte del emperador Cheng de Han, considerada una de les principales autores femenines de la China Han. Soseono (n. 67 e.C.) - reina coreana asociada a la fundación de Goguryeo y, según la tradición, al establecimientu posterior de Baekje.
Referencies
Enllaces esternos
Categoría:Sieglu I e.C.