Julián Ayesta Prendes foi un escritor, dramaturgu y diplomáticu asturianu. Foi collaborador de les delles revistes lliteraries de la posguerra, como Revista Garcilaso, Acanto, Fantasía o Juventud.
Biografía Nacíu nel senu d'una conocida familia asturiana, llicencióse en Derechu y en Filosofía y Lletres, y en 1947 ingresó na Carrera Diplomática. Nesti ámbitu ocupó diversos cargos en distintes llegaciones en Beirut, Bogotá, Ámsterdam, Viena y l'antigua Yugoslavia, na que foi Embaxador d'España -l'únicu embaxador español, yá que antes nun esistíen rellaciones diplomátiques y dempués desfíxose l'Estáu yugoslavu-.
Obres Foi autor de diverses obres de teatru, tales como A cencielles asina (1943), El cobarde Serafín (1943), La ciudá alloñada (1944) y El fusilamiento de los zares (1961), ente otres.
La so obra más conocida ye la curtia novela Helena o el mar del verano (primer edición: Ínsula, 1952; reeditada depués por Ediciones Arión, 1958; Seix Barral, 1974; Sirmio, 1987; Planeta, 1996; y El Cantil, 2000, con numberoses reimpresiones posteriores), "un llibru llenu de gracia y de frescura", según escribió José Luis Cano. La novela, única obra de narrativa del autor, foi traducida al francés (1992), al alemán (2004), al griegu (2005), al holandés (2006), al inglés (2008) y al italianu (2009).
Póstumamente publicáronse dos llibros con testos sos: Cuentos (Valencia, Pre-Testos, 2001) y Dibuxos y poemes (Madrid, Trotta, 2003), n'ediciones preparaes por Antonio Pau.
Una selección de los sos rellatos fueron recoyíos na Antoloxía del cuentu de posguerra, de Medardo Flaire (Madrid, 1994) y na Antoloxía de cuentistes españoles, de Francisco García Pavón (Madrid, 1984).
Referencies
Enllaces esternos
Categoría:Embaxadores d'España Categoría:Diplomáticos y diplomátiques d'Asturies Categoría:Escritores d'Asturies Categoría:Persones de Xixón Categoría:Escritores en castellanu