Rosina Gómez Baeza ye una xestora cultural asturiana, reconocida internacionalmente por dirixir mientres venti años la feria Internacional d'Arte Contemporáneo ARCO, contribuyendo a la internacionalización del arte contemporáneo español. Darréu foi direutora fundadora de la 1ª Bienal d'Arte, Arquiteutura y Paisaxe de les Islles Canaries y presidenta del Institutu d'Arte Contemporáneo IAC.
Biografía El so padre yera profesor na Escuela Politéunica del Exércitu. Ye bisnieta del pintor Sebastián Miranda y Pérez-Herce. Estudió na Universidá de Cambridge Lliteratura y Filoloxía Inglesa. Tamién estudió Pedagoxía na Universidá Politéunica de Londres y Historia del Arte y la Civilización Francesa na Universidá Católica de París. Foi profesora y traductora amás de participar viviegamente na constitución de la Institución Ferial Madrilana IFEMA, siendo la so primer direutora de certámenes feriales y de Desenvolvimientu.
Gómez Baeza foi direutora de la Feria d'Arte Contemporáneo ARCO ente 1986 y 2016. Direutora fundadora de la 1ª Bienal d'Arte, Arquiteutura y Paisaxe de les Islles Canaries ente 2005 y 2006. Presidenta del Institutu d'Arte Contemporáneo IAC ente 2005 y 2008. Direutora Fundadora de La Llaboral en 2007, a pocos quilómetros de Xixón crea un referente internacional tocantes a new media art denomináu Llaboral Centru d'Arte y Creación Industrial d'Asturies ente 2006 y 2011. Por esti motivu El Cultural dedíca-y nel añu 2009 una estensa entrevista realizada por Paula Aciar onde esplica los oxetivos del centru: dinamizar el mundu creativu asturianu y potenciar la internacionalidad de La Llaboral nel contestu nacional ya internacional por aciu la realización d'alcuentros europeos alredor de la innovación.
Amás ye socia, direutora y cofundadora de YGB ART en Madrid dende 2012, presidenta de Factoría Cultural, Viveru d'Industries Creatives. Mataderu-Madrid, codireutora d'un cursu d'Estensión Universitaria alredor de la innovación na cultura audiovisual (convocáu por La Llaboral, xunto a la Universitat Oberta de Catalunya y la Universidá d'Uviéu, xuráu de los Premiu Príncipe d'Asturies de les Artes y miembru del Conseyu del Institutu Internacional de posgráu de la Universitat Oberta de Catalunya (UOC). Ye socia de MAV (Muyeres nes Artes Visuales).
A lo llargo de la so carrera hai promovíu distintes iniciatives culturales en rellación a la producción artística y el so espardimientu, como la Fundación Arco y la Coleición d'Arte Contemporáneo, el Festival de Cine Esperimental de Madrid y Madrid Abiertu. Tamién impulsó la investigación alredor de artistes españoles y les sos resultaos fueron recoyíos na Enciclopedia d'Arte Español del Sieglu XX.
Amás dirixó numberosos foros y cursos d'arte contemporáneo, tanto fuera como dientro d'España, formó parte de numberosos xuraos, ya impulsó convocatories que dexen l'accesu del públicu a obres d'arte en soporte dixital.
Premios Foi premiada en distintes ocasiones y distinguida con delles condecoraciones: Medaya d'Oru al Méritu nes Belles Artes, 2009.
Gran Cruz de Cooperación Iberoamericana.
Distinción a la Excelencia Europea de la XE.
Caballeru de la Orde de les Artes y de les Lletres de la República Francesa.
Premiu a la Proyeición Internacional del Conceyu de Madrid.
.
Enllaces esternos https://elpais.com/tag/rosina_gomez_baeza/a https://www.lne.es/asturama/2012/02/22/tuvi-20-anos-frente-arcu-corazoncito-queria-asturias/1202828.html http://latamuda.com/entrevista-a-rosina-gomez-baeza-foru-arte-caceres-2015
Referencies
Categoría:Persones de Xixón Categoría:Traductores d'España Categoría:Wikipedia:Páxines con enllaces interllingüísticos