Valentín Vega Fernández foi un reconocíu fotógrafu asturianu.
Biografía Formóse en Xixón, onde creció, y en Valladolid onde desendolcó la so faceta artística. Los sos padres sentíen gran interés pola fotografía. Los sos hermanos acabaron por dedicase tamién a la fotografía montando los sos propios estudios. Mientres la Guerra Civil foi secretariu de la UXT en Xixón. Llegó a tar trés años presu pola so afiliación política. Hacia 1941 empezaría a visitar les Cuenques Mineres asturianes, especialmente la del Nalón, pola que sintió predileición, como fotógrafu ambulante o "fotógrafu de cai". En 1951 treslladóse a vivir a L'Entregu cola so familia, onde abrió un estudiu fotográficu. Equí exerció tamién nel institutu como profesor d'educación física y d'atletismu dende los años 60.
Valentín Vega ye especialmente conocíu poles sos semeyes de la vida cotidiana de les locaidades mineres d'Asturies nos años 40 y 50: comercios, mineros, muyeres carboneres, feries, parques, etc., mereciéndose'l respetu de los profesionales de la fotografía.
A pesar de la so prolífica obra, namái se consiguió salvar parte de la so obra del periodu 1941-1951 (más de 70.000 negativos) por parte del Muséu del Pueblu d'Asturies, onde se caltién. Ente xineru y marzu de 2017 el Muséu Nacional d'Antropoloxía (España) dedicó-y la esposición: "Valentín Vega: La vida por delante".
Publicaciones 2016ː Valentín Vegaː Fotógrafu de cai (1941-1951)https://www.gijon.es/es/publicaciones/valentin-vega-fotografo-de-calle-1941-1951/
Referencies
Enllaces esternos Valentín Vega, la esperanzada infancia na España de postguerra
Categoría:Persones de Gozón Categoría:Fotógrafos y fotógrafes d'Asturies