Newark ye la ciudá más poblada del estáu de Nueva Jersey (Estaos Xuníos), y centru alministrativu del condáu d'Essex. La ciudá, que ye ún de los mayores centros de distribución de tresporte marítimu, aereu y ferroviariu del país, tien .
Asitiada a unos 13 km al oeste de Manhattan, nel centru de la conocida como New Jersey's Gateway Region, ye la segunda mayor ciudá del área metropolitana de Nueva York. El so puertu de contenedores, Port Newark, ye'l mayor de la costa atlántica de los Estaos Xuníos; y el so aeropuertu (Newark Liberty International Airoport) foi'l primer aeropuertu comercial municipal del país, y ye anguaño ún de los de mayor tráficu de los Estaos Xuníos.
La ciudá acueye la sede de delles multinacionales, y tamién rescamplen delles de les sos universidaes (Rutgers–Newark, New Jersey Institute of Technology, Seton Hall University's Law School...) y edificios culturales (New Jersey Performing Arts Center) y deportivos (Bears & Eagles Riverfront Baseball Stadium). Divídese en cinco distritos, nos que conviven zones de paisaxe nidiamente urbanu con otros de calter periurbanu.
La ciudá foi fundada en 1666 por puritanos de Connecticut qu'aportaron, al mandu de Robert Treat, dende la colonia de New Haven. Nel sieglu XIX y principios del XX la ciudá espoxigó enforma, lo mesmo no que cinca a la so población como al desarrollu de la so industria. Por embargu, na segunda metá del sieglu pasáu entamó'l so declive, con grandes tensiones raciales que llegaron al so cumal nos disturbios de 1967. De magar 1990 la ciudá ta recuperando la so vitalidá.
Ver tamién
Referencies
Enllaces esternos
Categoría:Llocalidaes de Nueva Jersey