Francisco Pérez Muñiz foi un relixosu dominicu, teólogu, filósofu, profesor universitariu y escritor asturianu.
Biografía Nació na llocalidá asturiana de Corniana, nuna familia d'humildes llabradores. Empecipió a estudiar n'Humanidaes, nel colexu de San Xuan Bautista en Courias (1916-1920). En tomando l'hábitu de la Orde de Santu Domingo (30 d'agostu de 1920) en Courias, siguió ellí los estudios de Filosofía (1921-1923), realizando'l cuartu cursu na Universidá Pontificia de Salamanca (1923-1924), y concluyendo los cursos de Teoloxía nel conventu de San Esteban en Salamanca (1924-1929), onde llogró'l grau de llector en Teoloxía y ordenóse sacerdote.
Entamó la so carrera docente nel antiguu conventu de Courias, enseñando Metafísica ya Historia de la Filosofía Antigua y Media (1929-1930). Siguió nel conventu salamanquín de San Esteban (1930-1935) impartiendo les asignatures de Metafísica, Teodicea, Apologética y Teoloxía Dogmática. Y prosiguió nes Facultaes de Filosofía y de Teoloxía de la Universidá Pontificia de Santu Tomás d'Aquinu (1935- 1959). Enantes, la Guerra civil española sorprendiólu de vacaciones n'España, onde foi fechu prisioneru. Mientres esi tiempu estudió matemátiques y llingua aramea.)
En acabando la guerra civil española, regresó a Roma onde continuó enseñando nel Angelicum hasta que l'españíu de la Segunda Guerra Mundial sorprendiólu n'España. En Madrid, ensin poder tornar a Roma, foi profesor de Teoloxía Dogmática d'Álvaro del Portillo, José María Hernández Garnica y José Luis Múzquiz —los tres primeros miembros del Opus Dei— que se ordenaron el 24 de xunu de 1944.
En 1946 la Orde dio-y el títulu de maestru en Teoloxía. Pérez Muñiz escribió diversos artículos en Revista Española de Filosofía, en Ciencia Tomista y en La Vida Sobrenatural y contribuyó dafechu a la publicación del testu billingüe de la Summa theologiæ de Santu Tomás d'Aquinu, ediyada pola Biblioteca d'Autores Cristianos. Pérez Muñiz redactó les introducciones particulares, anotaciones y apéndices a los volúmenes I y III.
N'acabando'l cursu académicu 1958/59 enfermó y treslladóse a Madrid, onde falleció'l 26 de marzu de 1960.
Referencies
Enllaces esternos
Categoría:Teólogos y teólogues d'Asturies Categoría:Filósofos y filósofes d'Asturies Categoría:Profesores d'Asturies Categoría:Relixosos y relixoses d'Asturies Categoría:Dominicos d'España Categoría:Escritores d'Asturies Categoría:Persones de Salas