Dua Lipa, nada en Londres, Inglaterra, o 22 de agosto de 1995, é unha cantante, compositora e modelo británica de orixe albanokosovar. A súa carreira musical iniciouse aos 14 anos, cando comezou a versionar cancións doutros artistas en YouTube. En 2015 asinou coa discográfica Warner Music Group e aos 20 anos lanzou o seu primeiro sinxelo «New Love», seguido polo exitoso «Be the One».
En xaneiro de 2017, Dua Lipa gañou o premio á elección pública EBBA. O seu homónimo álbum de estudio debut lanzouse o 2 de xuño de 2017. O álbum xerou sete sinxelos, incluídos dous top 10 do Reino Unido «Be the One» e «IDGAF» e o sinxelo número un do Reino Unido «New Rules», que tamén alcanzou o número seis nos Estados Unidos.
En febreiro de 2018, Dua Lipa gañou dous premios Brit a solista británica e á maior irrupción musical británica. En abril, o sinxelo «One Kiss» de Dua Lipa e Calvin Harris alcanzou o número un no UK Singles Chart.
En febreiro do 2019, foi galardoada como «mellor artista novo» polos Premios Grammy, e a súa colaboración en «Electricity» con Mark Ronson e Dj Diplo recibiu o galardón de «mellor gravación de Dance».
Biografía
Infancia Dua Lipa naceu o 22 de agosto de 1995 en Londres, sendo a primeira filla dun matrimonio de refuxiados albanokosovares, Dukagjin e Anesa Lipa (de solteira Rexha) de Pristina, quen se trasladaron ao Reino Unido e establecéronse na capital británica en 1992, pola época en que tiveron lugar os sucesos de Saraxevo durante a guerra de Bosnia, un territorio que constituía a antiga Iugoslavia, do cal era orixinaria a súa avoa materna, que foi unha das causas que suscitaron a súa emigración, ademais do interese dos seus pais por culminar os seus estudos.
Á súa chegada a Inglaterra, Dukagjin conseguiu emprego nunha compañía produtora de festivais de música, como o de Glastonbury e o de Reading, que lle permitiu realizar os seus estudos de márketing na Chartered Institute of Marketing (CIM). Pola súa banda, Anesa especializouse en turismo, e do seu matrimonio con Dukagjin, naceron dous nenos máis: Rina, en maio de 2001, e Gjin, en decembro de 2005, quen se criaron xunto coa súa irmá máis vella no noroeste de Londres.
Dua Lipa herdou o seu gusto musical do seu pai, quen foi o vocalista e guitarrista da famosa banda de rock kosovar Oda, que se desfixo no ano 1998, logo da publicación do seu último álbum, 1998, aínda que, doce anos máis tarde volveu reunirse durante un curto tempo e alcanzaron a fama novamente grazas a unha versión da canción «Era», orixinal da banda Gjurmët, o seu maior éxito naquela época. Dukagjin sempre mantivo o seu interese pola música e adoitaba tocar en casa obras da súa autoría e cancións populares de artistas como David Bowie, Bob Dylan, Radiohead, Sting, The Police e Stereophonics. Nese ambiente familiar tan favorable á música criouse Lipa e o seu talento musical manifestouse moi cedo. Descubriu novas fontes de inspiración cando obtivo o seu primeiro material discográfico, o disco Whoa, Nelly! de Nelly Furtado e á súa vez mostrou un especial interese por M!ssundaztood de Pink, outra importante inspiración.Fraser, Holly (26 de outubro de 2016). «Dua Lipa on Falling in Love With Music and Growing Up Fast». Hunger (en inglés). Consultado o 21 de maio de 2017.
Os estudos primarios de Lipa incluíron leccións de música e o instrumento no que aprendeu as súas primeiras nocións musicais foi o violoncello, polo que se interesou vivamente, aínda que deixou de tocalo pois se lle facía difícil trasladalo a casa debido á súa baixa estatura. Cando fixo unha audición para ingresar no coro da escola, a súa voz era demasiado baixa para alcanzar as notas altas e o director non permitiu a súa admisión argumentando que as súas capacidades vocais non estaban o suficientemente desenvoltas, o que deixou a Lipa aflixida e insegura do seu talento artístico. Con todo, perseverou e pouco tempo despois comezou a recibir clases de canto os fins de semana na Escola de Teatro de Sylvia Young en Londres, e realizou grandes progresos en pouco tempo, grazas ao seu profesor Ray, baixo cuxo estímulo recobrou a confianza e foi instrumental en axudala a descubrir as súas aspiracións musicais. Cando tiña once anos, á vez que terminou a escola primaria, mudouse xunto coa súa familia a Pristina, a capital de Kosovo, unha vez lograda a independencia.
Traslado a Kosovo O seu traslado a Kosovo foi motivado polo destino laboral do seu pai, Dukagjin, un empresario de mercadotecnia, quen pouco tempo despois de establecerse en Pristina, no barrio de Sunny Hill onde crecera, fundou a axencia de comunicacións e mercadotencia Republika, na que ademais exerce como director executivo. Lipa asimilou o proceso de mudanza con optimismo e á súa chegada a Kosovo, quedou fascinada co sentido de «seguridade» e «comunidade» que percibía da capital. O proceso de adaptación que desenvolveu tamén foi magnífico e pronto conseguiu sentirse cómoda e feliz na súa nova residencia, pois contaba co apoio de varios coñecidos dos seus pais quen ían frecuentemente a visitalos a Londres xunto cos seus fillos, con quen pediu ir á mesma escola. Lipa tampouco tivo moita dificultade para desenvolverse no idioma local, xa que desde nena falara albanés en casa cos seus pais, aínda que non sabía escribir nin ler con fluidez.
Pola época en que Lipa chegou a Kosovo, coincidiu coa chegada de soados artistas de rap de Norteamérica que visitaban a rexión para realizar espectáculos musicais, así sufriu a influencia profunda neste estilo de música. Ademais, o seu pai estivo involucrado na produción de varios deses concertos por medio do seu traballo para unha axencia de telecomunicacións, polo que tivo a oportunidade de asistir a múltiples presentacións de rapeiros como Method Man & Redman, Snoop Dog e 50 Cent, de quen se mostrou particularmente entusiasta nese entón e describiu a súa actuación como a máis memorable á que asistiu. A súa estancia en Kosovo foi decisiva para que tomase conciencia da súa personalidade como cantante e pronto se fixo consciente de que non tiña moitas oportunidades de lanzar unha carreira alí, e que a única forma de alcanzar a fama mundialmente era se volvía a Londres. O seu desexo de regresar ao Reino Unido concretouse grazas á filla duns coñecidos dos seus pais, que ía á capital británica a realizar os seus estudos de posgrao, o que os fixo sentir máis confiados de deixala ir sen a súa compañía.
Regreso a Londres No seu regreso a Londres, aloxouse no barrio de Kilburn, onde viviu durante algún tempo antes de mudarse ao distrito de Camden, e comezou os seus estudos de secundaria no Colexio Parliament Hill e á súa vez ingresou novamente na Escola de Teatro de Sylvia Young a tempo parcial. Lipa ademais compaxinou a súa vocación musical con diversas ocupacións profesionais, traballou como camareira no restaurante mexicano La bodega Negra en Soho, como anfitrioa nun club nocturno en Mayfair e como modelo para o catálogo virtual de ASOS Marketplace, ata que a axencia insistiu en que tiña que perder peso para facer desfiles en pasarela, algo que rexeitou facer. Neste período desafortunado da súa vida inspiraríase logo o seu exitoso sinxelo de 2016 «Blow Your Mind (Mwah)».
No seu afán de conseguir un representante artístico e alcanzar a fama, á idade de quince anos empezou a publicar en YouTube as súas interpretacións de cancións como «If I Ain't Got You» de Alicia Keys e «Beautiful» de Christina Aguilera, e en 2012, cando tiña dezasete anos, escribiu a súa primeira canción «Lions, Tigers & Bears», inspirada no mago de Oz, que publicou na súa páxina de SoundCloud. Os seus vídeos non alcanzaron gran popularidade, pero despois dalgún tempo atraeu a atención de Ben Mawson, un representante de Warner Bros., quen a puxo en contacto cun gran número de produtores, incluíndo Emile Haynie, Andrew Wyatt e Stephen Kozmeniuk, con quen aprendeu o fundamental do oficio de compositor. Ao principio, Lipa estaba máis interesada en «descubrir» o seu son que en conseguir un contrato discográfico; quería ter un son como unha mestura entre o rapeiro J. Cole e a cantante pop Nelly Furtado, pero a reacción dos produtores non foi precisamente positiva. A primeira canción que Dua Lipa escribiu e axudou a dar sentido a esa «fórmula» foi «Hotter Than Hell», cuxa letra está «inspirada nunha relación tóxica que a fixo sentirse inútil». A produción nese momento consistía unicamente no son do piano e o bombo, e encantoulle a «escuridade» da súa melodía, combinada con «refráns pop» e un son «natural de rap nas estrofas». Foi grazas a esta canción que obtivo o seu contrato de gravación con Warner Bros., que asinou no verán de 2015, e o seu primeiro sinxelo, «New Love», estreouse a finais de agosto dese mesmo ano e recibiu excelentes críticas, como a recensión que escribiu Lindsey Weber para The Fader na que sostivo que é «sorprendentemente pesado, cun latexado palpitante que subliña a voz de Lipa, que é rouca e madura, como a de Joss Stone ou Lady Gaga». Con todo, para alcanzar o recoñecemento público foi necesario esperar ao lanzamento do seu seguinte sinxelo, «Be the One».
Dua Lipa (2015-presente) esquerda|miniatura|Lipa no SWR3 New Pop Festival 2016. Aínda que os seus inicios non foron os máis alentadores con «New Love» en agosto de 2015, Lipa en outubro publicou o seu seguinte sinxelo, «Be the One», co cal saltou á fama no estranxeiro, pois alcanzou os primeiros postos de popularidade de varios países europeos, incluíndo o número 1 en Bélxica, Polonia e Eslovaquia. Tamén tivo popularidade en Oceanía, especialmente en Australia, onde tivo un éxito enorme na lista musical, tras situarse entre as dez primeiras posicións e como resultado das súas vendas altas foi certificado dobre platino. Mentres que no Reino Unido foi un éxito dormente até principios de 2017, cando finamente ingresou na lista de sinxelos británica e obtivo o posto 9, o que a converteu na súa primeira canción entre o dez máis populares como artista principal. A finais de 2015, cando o seu nome foi incluído na lista de nomeados á BBC Sound of 2016, sinalou un cambio na súa carreira, pois chamara a atención da industria musical británica. Lipa debutou nas salas de concertos da súa patria entre xaneiro e febreiro de 2016, con grande éxito de público e logo actuou por primeira vez nos Estados Unidos no festival SXSW que tivo lugar en abril, mes no que contou cunha despregadura publicitaria enorme nos medios de comunicación por parte da canle de televisión MTV, que máis tarde lle valeu o seu primeiro nomeamento aos MTV European Music Awards 2016 como mellor artista push.