Patrick Süskind, nado o 26 de marzo de 1949 en Ambach (Baviera), é un escritor alemán e guionista de cine. Acadou sona internacional co seu libro O Perfume. Historia dun asasino.
Traxectoria Realizou estudos de Historia Medieval e Moderna na Universidade de Múnic e en Aix-en-Provence entre 1968 e 1974. Na década de 1980 traballou como un guionista televisivo, para "Kir Royal" e "Monaco Franze" entre outros.
Seu pai, Wilhelm Emanuel Süskind, foi escritor e tradutor, traballou durante longo tempo no periódico alemán Süddeutsche Zeitung. Seu irmán máis vello, Martin E. Süskind é xornalista.
A súa primeira obra foi o monólogo O contrabaixo, estreado en Múnic en 1981, que na tempada 1984/85 ofreceu 500 representacións, converténdose así na peza de teatro de idioma alemán con maior duración en cartel e séguese repoñendo habitualmente en teatros alemáns e internacionais. Mais o éxito chegoulle coa novela, O perfume (1985) traducido a máis de 40 linguas, entre elas o latín; a obra converteuse rapidamente nun best-séller con aproximadamente 15 millóns de exemplares vendidos; no ano 2006 o director Tom Tyker levouna ao cine. Outras obras súas son: A Pomba (1988), A historia do señor Sommer (1991)ou Tres Historias (1996).
Süskind concede moi poucas entrevistas, non aparece en público e rexeitou varios recoñecementos, como os premios de literatura Gutenberg, Tukan e FAZ. Non asistiu tampouco á estrea internacional da película O Perfume en Múnic.
Existen moi poucas fotografías de Süskind, aínda que na película para televisión "Monaco Franze" fai un pequeno papel de figurante no noveno episodio.
Obra Literatura Der Kontrabass ("O contrabaixo", 1981) O perfume (Das Parfum, 1985) Die Taube ("A pomba", 1987) Die Geschichte von Herrn Sommer ("A historia do señor Sommer", 1991) Drei Geschichten ("Tres historias" 1995) Über Liebe und Tod ("Sobre o amor e a morte", 2006)
Guións Der ganz normale Wahnsinn (A loucura máis normal", 1980, con Helmut Dietl) Monaco Franze (1982, con Helmut Dietl) Kir Royal (1986, con Helmut Dietl) Rossini – oder die mörderische Frage, wer mit wem schlief ("Rossini –ou a pregunta asasina, quen dorme con quen", 1997, con Helmut Dietl) Vom Suchen und Finden der Liebe ("Da procura e encontro do amor", 2005, con Helmut Dietl)
Categoría:Escritores en lingua alemá Categoría:Escritores de Alemaña Categoría:Nados en Baviera Categoría:Nados en 1949