Mariano Martínez Cuenca, nado en Cartaxena o 14 de xuño de 1899 e finado en Cidade de México o 16 de outubro de 1984, foi un impresor, político e sindicalista español.
Traxectoria Cara a 1904 trasladouse a Barcelona xunto á súa familia, onde dende novo comezou traballar no sector das artes gráficas como prensista. Influído polo socialismo, en 1912 afiliouse á Federación Gráfica do sindicato Unión General de Trabajadores (UGT) e en 1919 á Agrupación Socialista de Barcelona, da que foi secretario en 1926. Entre 1928 e 1933 foi secretario da Federación Catalana del PSOE e da federación catalá de UGT.
A pesar do seu desacordo coa postura do Partido Socialista Obrero Español perante o nacionalismo catalán, durante a Segunda República procurou a unificación das forzas socialistas daquela rexión. Despois do fracaso ó intentar integrar á Unió Socialista de Catalunya (USC) na Agrupación Socialista de Barcelona, promoveu unha escisión na FC do PSOE que en 1933 uniuse á USC, e foi elixido vicepresidente do novo partido. Tamén en 1934 escindiuse de UGT para fundar a Unió General de Sindicats Obrers de Catalunya.
En xaneiro de 1934 foi escollido concelleiro do Concello de Barcelona, mais perdeu o cargo cando foi encadeado a raíz da súa participación na proclamación do Estado Catalán. Ingresou de novo na corporación municipal cando foi liberado en febreiro de 1936 a causa da amnistía decretada despois da vitoria da Fronte Popular nas eleccións xerais.
Ó estalar a guerra civil española integrouse no Partit Socialista Unificat de Catalunya, do que foi secretario sindical do comité central e concelleiro de Asuntos Sociais no Concello de Barcelona. Ó terminar a guerra exiliouse en México, onde traballou como prensista na empresa de Avel·lí Artís i Balaguer e militou primeiro no Moviment Social d'Emancipació Catalana e despois no Partit Socialista Català, colaborando no seu boletín e noutras publicacións e entidades da Comunidade Catalá de México. Escribiu un libro de memorias que permanece inédito, La muralla invisible.
Notas
Categoría:Nados en Cartaxena Categoría:Sindicalistas da UGT Categoría:Sindicalistas de Cataluña Categoría:Políticos do PSOE Categoría:Finados en 1984 Categoría:Nados en 1899