Xoán Arias Suárez, finado en Santiago de Compostela en 1266, foi arcebispo de Santiago de Compostela entre 1238 e 1266. O goberno de Xoán Arias supuxo unha etapa de grande actividade construtiva e de fortalecemento do poder arcebispal en Santiago de Compostela. A súa figura está estreitamente ligada á introdución da arquitectura gótica na cidade e á configuración do conxunto catedralicio medieval.
Traxectoria Foi nomeado arcebispo de Santiago en 1238, sucedendo a Bernaldo II. Durante o seu pontificado consolidou o poder da mitra compostelá e mantivo unha estreita relación coa monarquía castelá, nun período marcado polos conflitos entre o arcebispado e o concello de Santiago.
Baixo o seu patrocinio acometéronse importantes obras na catedral de Santiago, entre elas a construción do claustro medieval (1240-1250), a remodelación da capela da Corticela e importantes reformas no Pazo de Xelmírez, ás que se engadiron diversas actuacións noutras igrexas galegas.
Tamén promoveu un proxecto para ampliar a catedral cunha nova cabeceira gótica, iniciativa que non chegou a completarse, aínda que os seus restos aínda son visibles baixo a actual praza da Quintana.
Castelo da Rocha Forte A Xoán Arias atribúeselle a construción do castelo da Rocha Forte, residencia fortificada dos arcebispos composteláns. A primeira referencia documental ao castelo data de 1253, aínda que a súa construción probablemente comezou con anterioridade durante o seu pontificado.
Segundo a documentación conservada, Xoán Arias faleceu no castelo en 1266 e no seu testamento incorporou a fortaleza á mesa arcebispal.
Notas
Véxase tamén Outros artigos Castelo da Rocha Forte Catedral de Santiago de Compostela Pazo de Xelmírez
Categoría:Nados en ano descoñecido Categoría:Finados en 1266 Categoría:Arcebispos e bispos de Compostela - Iria Categoría:Arcebispos da Igrexa católica latina