L'elettrotreno FS ETR.450 a l'è staa 'n elettrotreno a assett variabil a volta velocità faa su de la Fiat Ferroviaria, entraa in servizzi in su la tratta Milan-Roma in l'orari estiv del 1988 e l'è restaa in servizzi finna al 2015, quand che hinn staa tucc demolii, foeura che 'n unità preservada per el patrimoni istoregh.
Storia Ered del primm Pendolin, 'l entra in servizzi offizialment el 29 de magg 1988, cont dò cobbi non stop in tra Milan e Roma, cont on temp de percorrenza de 3 or e 58 menut. In principi l'era doperaa 'me treno a ses element domà de prima class, poeu hinn taccaa alter trii carrozz che gionten la segonda class.
Del 1989 al 1991 i servizzi hinn slargaa finna a Turin, Napoli, Salerno, Venezia, Bolzan e Ancona. Deventaa cont el temp el tren de ponta de la ferrovia italiana, l'è via via sostituii di noeuv Pendolitt e 'l pendolament, a causa de la difficoltà de toeu i pezz de ricambi, l'è tolt via in del 2004, che 'l sbassa el limit a 200 km/h. El servizzi in su la Roma-Milan l'è fornii in del 2007, ma el resta in servizzi Eurostar Italia in sui tratt de Roma a Ancona, Perugia e Tarent.
In del 2004 l'è doperaa anca per el servizzi TrenOK, primm esempi in Europa de treno a bass cost, che 'l resta in pee finna al 2007. Del 2010 a hinn doperaa per el servizzi InterCity, indova che despess fonzionen mal a causa de la scarsa manutenzion, e poeu mandaa in su la ferrovia Tirrenica Meridional per conligà Roma a Regg Calabria.
Voramai obsolett e sostituii di ETR.460, ETR.480 e ETR.600, in del 2013 Trenitalia la nonzia che sarann puu sottapognuu a revision generala e che donca 'sti treni sarien staa retiraa a la scadenza o quand che gh'è di guast assee gramm.
El doveva vess miss via el 9 de dicember 2014, cont on treno in tra Roma e Regg Calabria, che 'l s'è guastaa a Latina ma grazia ai treni straordinari l'è restaa in servizzi finna a l'ann noeuv. El 31 de marz 2015 el convoeuj 450.03 l'è portaa ai OGR per vess restaveraa e doperaa 'me mezz istoregh, i alter a hinn rottamaa.
Caratteristegh Faa su de noeuv carrozz e in quindes esemplar, l'era bon de rivà finna a 250 km/h e l'era dotaa de elettronega de potenza, el pendolament l'era elettro-idraulegh e bon de piegàss finna a 8°. Tucc i carrozz, foeura che voeuna, eren motorizzaa.
Bibliografia
Alter progett
Vos corelaa Elettrotreno FS ETR.401
450