El Charles Leclerc (nom complet Charles Marc Hervé Perceval Leclerc; Monaco, 16 de otover 1997) a l'è un pilota di auto monegasch, che 'l corr in Formula 1 con la Ferrari.
Campion de la GP3 Series 2016 e de la Formula 2 2017, del 2016 al 2018 l'è stad dent a la Ferrari Driver Academy e in del 2018 l'è andad a correr in la massima serie con la Sauber, per passà a la Ferrari l'ann dopo.
L'è el terz pilota monegasch a correr in Formula 1, dopo del Louis Chiron e del l'Olivier Beretta, e 'l pussee sgiovin a havé vensgiud un Gran Premi con la scudaria de Maranell.
Biografia Fioeul de l'Hervé Leclerc, pilota de Formula 3 in di agn '80 e '90, che l'è mort sgiovin per un longh mal quater di prima che 'l Charles el vinceva el Gran Premi de Baku de Formula 2 del 2017, l'è fradell minor del Lorenzo e magior de l'Arthur, anca lu pilota de auto per la Ferrari Driver Academy.
Quand che l'era un bagaj el gh'ha havud un raport strecc cont el pilota nizzard Jules Bianchi, poeu mort dopo de 'n incident in pista, che l'è stad anca el so guidazz, in di fad l'ha tacad a correr cont i cart in la pista del pader del Bianchi, a Brignoles, e 'l s'è sgiontad poeu anca lu a la compagnia ARM del Nicolas Todt.
El corr in Formula 1 cont el 16, che l'è sia el dì del so anniversari che la soma del so numer favorid, el 7, che l'era sgiamò ocupad del Kimi Räikkönen al moment.
Vita privada Del sginer 2015 al setember 2019 l'è stad morosad con la Giada Gianni, tosa napolitana che la viv de sgiovina in del Prenzipad e la studia economia a l'Università de Monaco. Incoeu l'è impegnad con la Charlotte Siné, studentessa de architetura a l'Università de Nantes e fioeula de l'Emmanuel Siné, diretor de la Société des Bains de Mer, che la se ocupa de l'intrateniment in del Pajes.
Carrera Kart El Leclerc l'ha scominciad la soa carrera in del 2005 in sui kart, a vincer el campionad franzes PACA in del midem ann e, anca, in del 2006 e in del 2008. In del 2009 l'è deventad campion cadet, per spostàss poeu in del 2010 in la class KF3, indova che l'ha vensgiud la Junior Monaco Kart Cup e l'ann dopo el va inanz in quella serie lì, a vincer la copa mondial CIK-FIA KF3, el trofee Academy CIK-FIA e 'l campionad del mond di Kart CIK-FIA Under-18.
El 2013 l'è stad el darrer so ann in del mond di kart, a otegnì el post quell de ses in del campionad europee CIK-FIA KZ1 e 'l segond in quell del mond CIK-FIA KZ, dree al futur campion de la Formula 1 Max Verstappen.
Formula Renault 2.0 El 2014 l'è 'l prim ann del monegasch in sui mono-post, a correr in la Formula Renault 2.0 Alps, per la scudaria britannega Fortec Motorsports. In quella stagion lì l'è stad bon de rivà in sul podi set voeulte, e de vincer do gare, o ben Monscia e Jerez de la Frontera, indova che l'ha batud el Matevos Isaakyan. L'ha fornid segond in classifega, dree al Nyck De Vries.
L'ha poeu tolt part, 'me pilota ospit, a la Eurocup Formula Renault 2.0, semper con la Fortec, a rivà in sul podi trè voeulte in su ses gare, a rivà segond al Nürburgring e in su l'Hungaroring.
Formula 3
El Leclerc l'ha tolt part a la Formula 3 europea in del 2015, a la guida de 'na vitura de la scudaria olandesa Van Amersfoort Racing. In del prim event de la stagion, a Silverstone, el ciapa la pole in gara 2 e 3 dopo che el Felix Rosenqvist, originariament in pole, l'è desqualifegad per di reson tecneghe. L'ha vensgiud la soa prima gara propi quell dì, in gara 3, a rivà prima de l'Antonio Giovinazzi e del Jake Dennis. In del fin setimana dopo el vinc a l'Hockenheimring, semper in gara 3, dopo havé ciapad du podi e trè vitorie per esordient.
El vinc poeu a Spa-Francorchamps in gara vun, a deventà el prim in classifega, ma poeu l'ha fornid la stagion quart, soratut per i dagn per vesses s'centrad a Zandvoort cont el Lance Stroll. A november 2015 l'è rivad segond al Gran Premi de Macao.
GP3 Series In del dicember 2015 el toeu part ai test dopo stagion de la GP3 Series con la ART Grand Prix e la Arden International, in del fevrer 2016 el Nyck De Vries el conferma la presenza del Leclerc in la stagion 2016 de la GP3 e la setimana dopo l'è ciapad ofizzialment de l'ART Grand Prix.
El vinc in la prima gara in del circuit de la Catalogna e, poeu, anca in Austria e Belgi. El 26 de november el se laurea campion a Abu Dhabi, anca se 'l gh'ha de retiràss de la corsa.
Formula 2
La setimana dopo che l'ha vensgiud el titol in GP3 ghe confermen che 'l corrarà in Formula 2 con la scudaria Prema Racing, insema al collega d'Academia Antonio Fuoco.
El monegasch el domina el prim toch de la stagion, a vincere cinch di prime dodes gare e set podi. El riva anca in pole position in di prim set corse, anca se in la darrera, quella d'Ongaria, ghe caven la posizzion per un'irregolarità relativa al diferenzial de la vitura, e la dann al Oliver Rowland de la DAMS.
A Spa-Francorchamps el ciapa la pole position quella de set, sota de 'n borineri d'aqua, e 'l vinc la gara feature cont un vantagg de 36 segond in su l'Oliver Rowland, che l'è rivad dedree de lu. Però, inn desqualifegad tucc e du per 'n irregolarità in sul dedree de la machina. In la gara sprint, oblegad a partì del fond, l'è bon de rivà al quint post.
El Gran Premi de Monscia ghe va no ben, desgià che in la gara feature 'l se qualifega quell de set e, in la lota per la prima posizzion cont el Nyck De Vries, se s'centren e lu el finiss domà quell de derset. In la gara sprint el partiss ancamò del fond, a rivà quell de noeuv.
In del fin setimana de Jerez el ciapa la pole quella de vot, a bater el record de categoria in man al Stoffel Vandoorne. In la gara 1 el mantegn la leadership per la pupart de la corsa, ma vers la fin la riva la safety car per un contat in tra Matsushita e Ferucci, roba che ghe permet al Rowland de tornàgh tacad al cul e, se 'l fuss bon de vincer, de tegnì verta la corsa al titol, ma infin l'è el Leclerc a passà per prim la linia de fin, a portàss a cà el titol tre gare prima de la fin.
In la gara 2 el partiss quell de vot ma el gh'ha de tornà ai box, insema al compagn de squadra Fuoco, perchè i gome inn degradade, e l'è bon de rivà al quart post, prima de vesser superad al darrer sgir del Luca Ghiotto, del compagn Fuoco e del De Vries, a fornì quell de set.
A Abu Dhabi el se qualifega in la prima gara quell de set, a finì segond, dopo che 'l Fuoco e 'l Rowland inn desqualifegad. In la segonda gara, a partì al sit quell de set, el fa 'n oltra rimonta, el vinc la soa gara quella de set in la stagion, a fà pari el record del Stoffel Vandoorne.
El forniss donca el campionad prim, con 282 pont.
Formula 1 I prim test (2016-2017)
In del marz 2016 la Ferrari la nonzia che, de member de la Ferrari Driver Academy, el saria deventad collaudator de la Haas e de la Ferrari midema e propi 'me collaudator el corr in di proeuve libere del Gran Premi de Gran Bretagna del midem ann, a guidà la mono-post statunitensa. El 9 de masg 2016, a provà la veggia Ferrari F14 T in sul circuit de Fioran el riva ai 300 km de guida in sui auto de Formula 1, necessari al ciapà la Superlicenza FIA.
A avost 2017 el fa el prim dì de proeuve in Ongaria in su la Ferrari SF70H, progetada per quell ann lì, e l'otegn el temp el pussee bon del dì. In del midem mes el corr anca per el test di gome Pirelli de l'ann dopo.
El 22 de setember a l'è ofizzializad el so toeu part a quater session de proeuve libere in del campionad 2016 con la Sauber. Set dì dopo el fa la prima proeuva, sota la pioeuva in del circuit de Sepang, a rivà quell de sedes, dedree al compagn de squadra Pascal Wehrlein.
El 29 de november el toeu part ai proeuve in del circuit de Yas Marina per ciapà dacc in sui mescole Pirelli per l'ann dopo, e 'l 2 de dicember l'è confermad pilota per el 2018 con la scudaria elvetiga, insema al Marcus Ericsson, che l'è confermad ancamò.
Sauber (2018)
In la prima gara de la stagion, in Australia, el riva quell de desdot in qualifega e quell de tredes in gara, a vint segond de la zona pont. Dopo de 'n poo de fin setimana che ghe vann minga tant ben e indova che l'è no bon de fàss vidé, al gran premi de Baku l'è bon de rivà quell de sest, a ciapà per la prima voeulta di pont, vot in 'sto cas. In di gare dopo, foeura che per el Gran Premi de Monaco, el ciapa vari pont, adiritura in del Gran Premi d'Austria el riva quell de noeuv, con l'Ericssen apena dree, a dà 'n dobi piazzament per la scudaria svizzera per la prima voeulta del 2015.
In la gara dopo, a Silverstone, el gh'ha de retiràss per una goma tacada mal dopo de 'n pit stop, fina a quell moment lì l'era quell de vot, in Germania, dopo de 'na bona qualifega, el finiss indree, per via del temp gram, menter in Ongaria el gh'ha de retiràss, per via de 'n incident al prim sgir, e l'istessa roba la capita in Belgi. Al Gran Premi d'Italia a Monscia el riva quell de vundes.
In di gare dopo el ciapa pont per do voeulte de fila, a Singapore el riva quell de noeuv e in Russia el riva quell de set, apena dopo di pilota di trè scudarie pussee fort. In la gara in Giapon el se retira per un testa-coa, menter in Giapon per un incident cont el Romain Grosjean. Dopo, in Messich e in Brasil, el riva quell de set, a permeter a la Sauber de passà la Toro Rosso in la classifega costrutor e de rivà quella de vot.
El finiss la stagion quell de tredes, con 39 pont, e l'è votad rookie de quell ann lì.
Ferrari (del 2019) 2019
El 11 de setember 2018 l'è nonziad che el pilota monegasch el corrarà con la Ferrari de la stagion despoeu, a sostituì el Kimi Räikkönen e deventà compagn de squadra del Sebastian Vettel. El fa i prime proeuve con la soa vitura, la Ferrari SF90, in di test pre-stagionai a Barcellona, a segnà el prim temp in classifega.
In la prima gara de la stagion, in Australia, el riva quell de cinch e in la gara dopo, in Bahrain, el deventa el segond pilota el pussee sgiovin de la storia, dopo del compagn Vettel, a ciapà 'na pole position. El dì dopo el ciapa el so prim podi e gir svelt, a rivà terz in d'una gara indova che l'ha guidad per la pupart de la corsa, per poeu havégh de lassà el post al Lewis Hamilton e al Vallteri Bottas per via de 'n problema al motor.
Dopo de 'n poo de corse minga assee bone, in Canada el ciapa el so segond podi de la carrera in Formula 1, a rivà terz dedree de l'Hamilton e del Vettel, istess poeu in del Gran Premi de Franza. In Austria el ciapa la soa segonda pole, a fà anca el record del circuit, a finì segond dedree al Max Verstappen, ma dopo havé guidad la corsa per la pupart del temp. El riva ancamò a podi in Gran Bretagna, indova che 'l riva terz grazzia a 'n incident in tra 'l Vettel e 'l Verstappen.
Dopo vesses retirad, sota 'n diluvi, al Hockenheimring, e vesser rivad a pont a l'Hungaroring, el vinc per la prima voeulta in Belgi, a dà anca a la Ferrari la prima vitoria de la stagion e la prima vitoria in la storia del sport per un monegasch e 'l deventa anca el pussee sgiovin pilota a vincer un Gran Premi con la Ferrari, a bater el Jacky Ickx dopo de cinquant'agn. El se ripet la gara dopo a Monscia, a fà vincer el cavallin rampant in Italia per la prima voeulta de noeuv agn, de la vitoria del Fernando Alonso.
El riva in pole anca a Singapore e in Russia, indova che l'è semper bon de rivà in sul podi, e 'l riva pari al Michael Schumacher in sul ciapà quater pole position cont una Ferrari. Dopo de trè gare senza podi e 'n retir in Brasil, per via de 'n incident cont el Vettel, el torna in sul podi, terz, in la darrera corsa a Abu Dhabi: el finiss la stagion quart, con 264 pont, a ciapà anca el Trofee Pole FIA.
2020