mini|Tversnitt av ein senketunnel, markert med grått, som ligg i ei renne i sjøbotnen. Attfyllings-massane på kvar side er markert med grøn-gult og den steinfyllinga oppå som skal halde tunnelen på plass og verne han mot skadar, er synt på toppen av tunnelen. Over dette breier det seg blått sjøvatn. mini|Ferdige seksjonar av senketunnelen Tweede Coentunnel Bouwdok Barendrecht i Nederland, bygd i ei grop som ligg under vassflata, utgrave for å nyttast som byggjeplass. Seksjonane er tetta i endene, slik at gropa kan opnast mot vatnet og fyllast, og seksjonane deretter slepast ut og på plass.
Senketunnel er ein undersjøisk veg- eller jarnbanetunnel som er laga på land som ferdige seksjonar i stål eller betong, til dømes bygd i ei tørrdokk, og deretter dregen i overflatestilling over sjøen eller vatnet til staden der tunnelen skal gå, der seksjonane vert senka ned i ei renne som er graven ut i sjøbotnen på førehand. Her vert seksjonane skøytt vasstett saman, og steinfyllingar eller betonggfyllingar vert nytta for å hindre at han flyt opp att, og elles sytt for at han får ei tyngd som gjer han stabil. Slik ballast vert anten lagt i botn av tunnelen eller oppå han.
Senketunnelar er vanleg å nytte der vatnet er grunt og botnen er av lausmassar som gjer at ein ikkje kan sprengje ut tunnelen i fjell, slik det elles er vanleg med undersjøiske tunnelar. Senketunnelar kan nyttast i kombinasjon med undersjøiske fjelltunellar på strekningar av traseen dersom botntilhøva gjer dette naudsynt.
Skansentunnelen i Trondheim er den fyrste senketunnelen som vart bygd i Noreg, men det var senketunnelen på tunnelstrekninga under vatnet i Bjørvika i Oslo som vart teken i vanleg bruk fyrst.
Sjå òg Undersjøisk tunnel
Kategori:Undersjøiske tunnelar