Iver Johan Davidsson Unsgård () var ein norsk småbrukar, arbeidar og politikar frå Tydal i Sør-Trøndelag. Han representerte Arbeidarpartiet på Stortinget i tida 1958-69.
Unsgård var son til ein gardbrukar og snikkar, og voks opp på småbruket Kirkhus i Tydal. Etter folkeskulen gjekk han skulevinteren 1923/24 på folkehøgskule. Han livnærte seg som anleggs- og skogsarbeidar, frå 1939 også som småbrukar.
Unsgård kom for alvor inn i arbeidarrørsla som styremedlem og seinare formann i Tydal AUF i 1920-åra. Arbeidarpartiet fekk auka oppslutnad i Tydal i åra etter fyrste verdskrigen, og etter valet i 1934 sat partiet med reint fleirtal i heradsstyret. Unsgård var så ordførar i Tydal 1935-37 og på ny 1948-58, heile tida med Arbeiderpartiet i fleirtalsposisjon.
Ved stortingsvalet hausten 1957 vart Unsgård vald inn på Stortinget frå Sør-Trøndelag. Med attval i 1961 og 1965 vart han verande på tinget til hausten 1969. Han var medlem 1958-61 i Protokollkomitéen og frå hausten 1961 i Landbrukskomitéen til han i 1969 sa nei til renominasjon til Stortinget 1969-73.
Unsgård var formann 1959-63 i Landsrådet for viltstell, jakt og fangst, og 1968-74 styremedlem i Statens Kornforretning.
Kjelder Stortingsbiografi
Kategori:Stortingsrepresentantar 1958-1961 Kategori:Stortingsrepresentantar 1961-1965 Kategori:Stortingsrepresentantar 1965-1969 Kategori:Folk frå Tydal